Анас розияллоҳу анҳудан ривоят қилинади:
«Пайғамбар соллаллоҳу алайҳи васаллам:
«Ким намозимизни ўқиса, қибламизга юзланса ва сўйган (гўштимиз)ни еса, бас, ўша Аллоҳнинг зиммасидаги ва Унинг Расулининг зиммасидаги мусулмондир. Бас, Аллоҳнинг аҳдига хиёнат қилманглар», дедилар».

Баро розияллоҳу анҳудан ривоят қилинади:
«Пайғамбар соллаллоҳу алайҳи васаллам билан ўн олти ой ёки ўн етти ой Байтул Мақдис томонга намоз ўқидик. Сўнгра Каъба томонга бурилиндик».
Бухорий, Муслим, Термизий, Насаий ривоят қилган.

Ибн Умар розияллоҳу анҳудан ривоят қилинади:
«Одамлар Қубода Бамдод намозини ўқиб турганларида, бирдан бир одам келиб:
«Расулуллоҳ соллаллоҳу алайҳи васалламга бу кеча оят нозил қилинди. Батаҳқиқ, У кишига Каъбага қараш амр қилинди. Бас, сиз ҳам ўша томонга қаранглар», деди.
Уларнинг юзлари Шомга қараган эди, Каъбага қараб айландилар».
Бухорий, Муслим, Абу Довуд, Насаий ривоят қилган.

Баро ибн Озиб розияллоҳу анҳудан ривоят қилинади:
«Расулуллоҳ соллаллоҳу алайҳи васаллам Каъба томон юзлантиришларин яхши кўрар эдилар. Бас, Аллоҳ: «Бас, Биз юзингни осмонга қараб бурилишини кўрурмиз. Албатта, сени ўзинг рози бўлган қибла томон бурурмиз. Бас, юзингни Масжидул Ҳаром томон бур. Ва қаерда бўлсаларингиз ҳам юзларингизни у томон бурингиз» оятини нозил қилди. Бас, У зот Каъба томон юзландилар».
Бухорий ва Термизий ривоят қилган.

Абу Ҳурайра розияллоҳу анҳудан ривоят қилинади:
«Пайғамбар соллаллоҳу алайҳи васалам:
«Мағриб ила Машриқ ораси қибладир», дедилар».
Ибн Можа, ал-Ҳоким, ад-Дора Қутний ва Термизийлар ривоят қилган.

Омир ибн Рабийъа розияллоҳу анҳудан ривоят қилинади:
«Пайғамбар соллаллоҳу алайҳи васаллам билан зулматли кечада сафарда эдик. Қибла қайси тарафда эканини била олмадик. Биздан ҳар бир киши ўз билганича қараб намоз ўқиди. Тонг отдирганимиздан кейин буни Пайғамбар соллаллоҳу алайҳи васалламга зикр қилдик. Бас: «Аллоҳнинг юзи қаён қарасангиз шул томонда» ояти нозил бўлди».
Термизий ривоят қилган.