عن ابى هريرة رضى اللهُ عنه قال: قال: رسول الله صلى الله عليه وسلم " مَنْ كانت له مظلمةٌ لأخيهِ من عرْضه أوْ شئ فليتحلله منه اليومَ قبل ألا يكونَ دينارٌ ولا درْهم، إن كان له عملٌ صالح أخذَ منهُ بقدرِ مظلمتِهِ، وإن لم تكن له حسناتٌ أخذ من سيئاتِ صاحبه فحُملَ عليهِ".

Абу Ҳурайрадан (р.а.) ривоят қилинади. Расулуллоҳ (с.а.в.): “Кимнинг биродарининг обрўсида ёки бошқа нарсасида зулми бўлса динор ва дирҳамлар фойда бермайдиган кун келишидан олдин ҳалоллаб, рози қилиб олсин. Чунки Қиёмат куни зулми миқдорича солиҳ амалидан олиб қўйилади. Агар солиҳ амали тугаб қолса ёмонлигидан олиб зулм қилган киши устига юкланади”, дедилар.
Шарҳ: Расулуллоҳ (с.а.в.) мол-дунё, бола-чақа фойда бермайдиган кун бўлишидан олдин, золим, адо этишдан ожиз бўлиб қолишидан олдин ҳаёти дунёдалик пайтида ҳақларни адо этиб олишга чақирмоқдалар. Ким бирор кишига обрў ёки молида зулм қилса, яхшиликлари олиб қўйиб, ёмонлик юклаш билан қасос олинадиган кун келишидан олдин, ҳаёти-дунёдалик пайтида мазлумидан кечирим сўраб, ўзини оқлаб олсин чунки ўша куни зарар кўрган томонга яхшиликлари олиб берилади. Бордию зулми тугамасидан туриб яхшилиги тугаб қолса, ёмонлигидан ўзига олади. Сўнгра ёмонлиги кўпайиб кетгач, дўзахга улоқтирилади.