عن أبى هريرة رضى الله عنه أنّ رجلا أتى النبى صلى الله عليه وسلم يتقاضاه فأغلظ، فهم به أصحابُهُ فقال رسول الله صلى الله عليه وسلم دعوه فإن لصاحبِ الحقِّ مقالاً اشتروا له سنا فأعطوه إياه فقالوا: إنا لا نجد غلا سنا هو خير من سنه قال: اشتروه فأعطوه إياه فإن من خيركم او خيركم احسنكم قضاء.
Абу Ҳурайра (р.а.)дан ривоят қилинади. Бир киши Расулуллоҳ (с.а.в.) ҳузурларига келиб, қарзини сўрашда қўполлик қилди. Саҳобалар уни койишни қасд қилишган эди, Расулуллоҳ (с.а.в.) қўяверинглар, чунки ҳақдорни гапиришга ҳаққи бордир. Уни туяси каби туя сотиб олиб беринглар, дедилар. Саҳобалар: “Биз унинг туясини ёшидаги каби туя топа олмаяпмиз балки ундан яхшироғи бор экан”, дейишган эди, Расулуллоҳ (с.а.в.): “Майли сотиб олиб бераверинглар чунки сизларни яхшиларингиз қарзини чиройли тарзда адо этувчиларингиздир”, дедилар. Шарҳ: Қўпол бир аъробий Расулуллоҳ (с.а.в.) олдиларига келиб, берган қарзини қайтаришларини талаб қилди. Талаб қилганда ҳам қўполлик ва бақир-чақир қилиб юборди. Саҳобалар бу ҳужумдан ғазаб отига минишди. Хусусан аъробийни бу каби муомала қилишини оқловчи ҳеч нарса йўқ эди. Чунки аъробий олдин қарзини талаб қилмаган, Расулуллоҳ (с.а.в.) эса рад этиб, муҳлатни чўзмагандилар. Саҳобалар ҳам унинг муомаласига ўхшаш ёмон муомала қилишни хоҳлашган эди. Лекин Расулуллоҳ (с.а.в.) тарк қилишни буюриб, у ёмон муомала қилган бўлса ҳам ҳақдордир, дедилар. Кейин у зот саҳобаларга худди қарзга берган туяси каби туя қайтаришни буюрдилар. Саҳобалар садақага ажратилган туялар ичида уни туясига ўхшаш туя топа олишмади-да, эй Аллоҳнинг расули! Уни туясидан кўра ёши яхшироқ туяни топдик холос, дейишди. Расулуллоҳ (с.а.в.): “Яхшисини бераверинглар, чунки муомаладаги яхшиларингиз қарзни тўлашда ҳам яхшиларингиздир”, дедилар. Аъробий яхши туяни олгач Расулуллоҳ (с.а.в.)га шундоқ бир хурсандлик ва ажабланиш маъносида қараб: “Менга тўла-тўкис қилиб бердинг, Аллоҳ ҳам сенга тўла-тўкис қилиб берсин”, деди. Юқори одоб соҳиби бўлган Расулуллоҳ (с.а.в.)га ва пайғамбарини ҳимоясига шай турган саҳобаларга Аллоҳнинг саломи бўлсин.
|