عن المقدام رضى الله عنه قال: قال رسول الله صلى الله عليه وسلم "ما أكل أحد طعاما قطّ خيرا من أن يأكل من عمل يده، و إنّ نبى الله داود عليه السلام كان يأكل من عمل يده".
Миқдом (р.а.)дан ривоят қилинади. “Расулуллоҳ (с.а.в.): “Ҳеч ким ҳеч қачон ўз қўли билан топган таомдан яхшироқ таом еган эмас. Аллоҳнинг пайғамбари Довуд (а.с.) ўз қўли билан топганидан ер эди”, дедилар. Шарҳ: Расулуллоҳ (с.а.в.) ҳаракат, иш ва емакда ҳалол йўл танлашга тарғиб этмоқдалар. Балки янада ҳалолроқ бўлган қўл меҳнатига йўлламоқдалар. Лекин бу Исломий даъват ҳозирги асримизда мусулмонлар қулоғига чалинмаганга ўхшайди. Чунки дунёдаги мусулмонларни ишлаб чиқаришлари заифлашиб, жаҳолат, камбағаллик ва касаллик қамраб олди. Соғлом жисм ва яхши кўринишда бўлган кимсалар ҳам ҳар хил ниқоб остида тиланчилик йўлига ўтиб олишди. Ўшалардан масалан кафтга дам солувчи, қумга фол очувчи, ёлғондакам тасаввуф шайх, мусофир, ҳийла, найранг ва шунга ўхшашлардир. Мана шу нарсалар Ислом ва мусулмонлар пешонасидаги тамғадир. Лекин мусулмонлардан бошқалар “Ишламаган тишламайди” шиори остида бирлашиб, амал қилиб, пешқадам бўлишмоқда. Унинг учун ана ўша мусулмонмас қавмлар дунё тизгинини қўлга олиб, Ислом ва мусулмонларни лоқайд, заиф, қолоқ ва шунга ўхшаш ёмон атамалар билан номламоқдалар. Ислом бу каби сифатлардан тамоман йироқдир. Агар тарихга назар соладиган бўлсак, масалан Абдураҳмон ибн Авф Мадинага қуп-қуруқ, сармоясиз ҳижрат қилдилар. Набий алайҳиссалом Абдураҳмон ибн Авф билан Саъд ибн Рабийъни исломий биродар қилиб қўйдилар. Шунда Саъд Абдураҳмонга: “Мен ансорлар ичидаги энг бадавлат кишиман. Сенга мол-дунёимни ярмини бўлиб берайин. Қарагин қайси аёлимни муносиб кўрсанг, у хотиним ҳалол бўлган муддатдан сени ихтиёрингга ўтсин”, деганида, ҳақиқий Ислом шахсияти мужассам бўлган Абдураҳмон ибн Авф: “Бунинг учун менда ҳожат йўқ. Тижорат қилиш учун бозор борми? Менга ўшани кўрсат? Дедилар. Икковлари Қайнуқо бозорига боришди. Абдураҳмон ибн Авфда пишлоқ ва сарёғ бор эди. Аллоҳ номига қасам улуғ саҳобий бозорда пишлоқ ва сарёғ сотишдан ҳаё қилмасдилар. Фақат одамларга боқиманда бўлишдан ҳаё қилардилар. Аллоҳим мусулмонларни ўзингни тўғри йўлингга ҳидоят қил.
|