عن ابن عبّاس رضى الله عنهما قال:" قدم النبى صلى الله عليه وسلم المدينة فرأى اليهود تصوم عاشوراء فقال: ما هذا؟ قالوا: يوم صالح، هذا يوم نجّى الله عزّ وجلّ بنى إسرائيل من عدوهم فصامه موسى، قال: فأنا أحقّ بموسى منكم ، فصامه، و أمر بصيامه"

Ибн Аббос (р.а)дан ривоят қилинади. “Набий (с.а.в.) Мадинага келиб, яҳудийлар Ашуро куни рўзасини тутаётганларини кўрдилар ва: “Бу нима?” дедилар. Бу солиҳ кундир. Бу кун Аллоҳ Таъло Бани Исроилни душманидан қутқарган кун. Ўшанда Мусо унинг рўзасини тутган” дейишди. У зот: “Мен сизлардан кўра Мусога ҳақлироқман” деб унинг рўзасини тутдилар ва уни тутишга амр қилдилар.
Шарҳ: Қурайш Ошуро кунини улуғлаб, ўша куни каъбапўшни янгилаб, зийнатлашар ҳамда ушбу кунда рўза тутишар эди. Нуҳ ва Мусо алайҳиссаломлар нажот топиб, кофирлар ғарқ бўлгани учун шукрона тарзида ушбу кун Набий (с.а.в.) ҳам рўза тутардилар.
Қачонки Набий алайҳиссалом Мадинага борганларида қарасалар, яҳудийлар ҳам Ошуро куни рўза тутишаётган экан. Улардан рўзаларини сабабини сўрадилар. Яҳудийлар: “Ушбу куни Мусо ва Бани Исроил душманидан халос бўлгани учун Аллоҳга шукр қилган ҳолда рўза тутган. Биз ҳам ушбу кунни улуғлаган ҳолда рўза тутамиз”, дейишди. Шунда Расулуллоҳ (с.а.в.) уларга қарата: “Мен сизлардан кўра Мусо (а.с.)га ҳақлироқман”, деб, кейин саҳобаларга қарата: Сизлар ҳам улардан кўра Мусо (а.с.)га ҳақлироқсизлар, Ошуро куни рўза тутинглар, дедилар. Рамазон рўзаси фарз бўлгач Ошуро куни хоҳлаганлар рўза тутди, хоҳлаганлар тутмади. Расулуллоҳ (с.а.в.) ошуро рўзасини фазилати ҳақида гапириб: “Ундан олдинги йиллардаги гуноҳларга каффорат бўлишини Аллоҳдан умид қиламан”, дедилар.