Аллоҳ таоло Моида сурасининг 2-оятида «Яхшилик ва тақвода бир-бирингизга ёрдам беринглар», деб айтган.

817/1. Абу Ҳурайрадан (р.а.) ривоят қилинади. Расулуллоҳ соллаллоҳу алайҳи васаллам: «Ким ҳидоятга чақирса, эргашувчи кишининг савобидек унга ҳам ажр бўлади. (Бу билан амал қилган кишининг) савобидан бирор нарса камаймайди. Кимки залолатга чақирса, эргашувчи кишининг гуноҳидек унга гуноҳ ёзилади. (Бу билан амал қилган кишининг) гуноҳидан бирор нарса камаймайди» дедилар. Имом Муслим ривоятлари.

818/2. Абу Масъуд ал-Ансорий ал-Бадрийдан (р.а.) ривоят қилинади. Расулуллоҳ соллаллоҳу алайҳи васаллам: «Ким яхшиликка далолат қилса, унга ҳам бажарувчининг ажридек савоб бўлади», дедилар. Имом Муслим ривоятлари.

819/3. Саҳл ибн Саъддан (р.а.) ривоят қилинади. Расулуллоҳ соллаллоҳу алайҳи васаллам Алига (р.а.): «Аллоҳга қасамки, сен бир кишини ҳидоятга бошламоғинг қизил туядан ҳам яхшидир», деб айтдилар. (Қизил туя илгари арабларнинг энг қимматбаҳо мулки бўлган... - тарж.) Имом Бухорий ва Муслим ривоятлари.

Саҳиҳ ривоятларда келтирилишича, Расулуллоҳ соллаллоҳу алайҳи васаллам: «Модомики, бандаси биродарининг ёрдамида бўлса, Аллоҳ бандасининг ёрдамидадир», деганлар.