Билингки, жамоатга ваъз қилаётган ёки уларга илм бераётган киши ана шу нарсаларни малол келтирадиган даражада узун қилмасдан, унинг ҳаловати ҳамда улуғлиги қалблардан кетиб қолиб малол кўрилмаслиги учун ҳамда илм ва яхши нарсаларни тинглашни кариҳ кўриб хатарга йўлиқмасликлари учун иқтисод қилмоқлари маҳбуб амалдир.

815/1. Шақиқ ибн Саламадан (р.а.) ривоят қилинади. Ибн Масъуд (р.а.) ҳар пайшанба куни ваъз қилиб берардилар. Шунда бир киши: «Эй Абу Абдураҳмон (ибн Масъуд), бизга ҳар куни ваъз қилиб беришингизни истардим», деди. Ибн Масъуд: «Сизларга малол келишини кариҳ кўрмоғим мени ҳар куни ваъз қилишдан қайтаради. Ва Расулуллоҳ соллаллоҳу алайҳи васаллам бизга малол келишидан қўрқиб ваъз ҳавола қилганларидек, мен ҳам сизларга шундай ваъз тақдим этаман», дедилар. Имом Бухорий ва Муслим ривоятлари.

816/2. Аммор ибн Ёсирдан (р.а.) ривоят қилинади. Расулуллоҳ соллаллоҳу алайҳи васаллам: «Кишининг намозини узун қилиб, хутбасини қисқа қилиши фақиҳлигига далолат қилувчи аломатдир. Бас, шундай экан, намозларингизни узун қилиб, хутбаларни қисқа қилинглар», деб айтдилар. Имом Муслим ривоятлари.

Ибн Шиҳоб Зуҳрий: «Агар мажлис узайиб кетса, унда шайтоннинг насибаси бордир», дедилар.