812/1. Саид ибн Мусаййибдан (р.а.) ривоят қилинади. Абу Аюб ал-Ансорий (р.а.) Расулуллоҳ соллаллоҳу алайҳи васаллам соқолларидан азият берувчи нарсани олиб ташлаганида, Расулуллоҳ соллаллоҳу алайҳи васаллам:
«Масаҳаллоҳу анка йа або Аййуба ма такраҳу», («Эй Абу Аюб, ёмон кўрган нарсангни Аллоҳ сендан ҳам ўчирсин»), дедилар. Ибн Сунний ривоятлари.
Саъддан қилинган бошқа бир ривоятда айтилишича, Абу Аюб (р.а.) Расулуллоҳ соллаллоҳу алайҳи васалламдан бир нарсани олиб ташлаганида, Расулуллоҳ соллаллоҳу алайҳи васаллам
«Ла якун бикас сув’у йа або Аййуб, ла якун бикас сув’у», («Эй Абу Аюб, сенга ёмонлик бўлмасин, сенга ёмонлик бўлмасин»), дедилар.
813/2. Абдуллоҳ ибн Бакр ал-Боҳилийдан (р.а.) ривоят қилинади. Умар (р.а.) бир кишининг соқолидан (ёки бошидан) бир нарсани олиб ташлаганларида, у киши: «Аллоҳ сиздан ёмонликни кетказсин», деди. Шунда Умар (р.а.): «Мусулмон бўлганимиздан бери биздан ёмонлик кетказилган. Ва лекин агар сендан бирор нарса олиб ташланса,
«Ахазат ядока хойрон» («Қўлинг яхшиликни олсин»), деб айтгин», дедилар. Ибн Сунний ривоятлари.
|