781/1. Умар ибн Хаттобдан (р.а.) ривоят қилинади. Расулуллоҳ соллаллоҳу алайҳи васаллам: «Кимки бозорга кирганда,

 «Ла илаҳа иллаллоҳу ваҳдаҳу ла шарийка лаҳу, лаҳул мулку валаҳул ҳамду юҳйи ва йумийту ва ҳува ҳаййун ла ямувту биядиҳил хойру ва ҳува ъала кулли шай‘ин қодир», деса, Аллоҳ таоло унга бир миллион ҳасанот ёзиб, бир миллион ёмонликни ўчириб ва бир миллион даража кўтаради», дедилар. (Маъноси: «Якка Аллоҳдан бошқа илоҳ йўқ. Унинг шериги ҳам йўқ. Барча мулк Аллоҳникидир ва ҳамд Унинг учундир. У (зот) тирилтиради ва ўлдиради. У тирикдир, ўлмайди. Яхшилик Унинг қўлида ва У ҳар бир нарсага қодирдир».) Имом Термизий ва бошқалар ривояти.

Имом Ҳокимнинг баъзи ривоятларида «У учун жаннатда уй қурилади»ни зиёда қилинган.

Ровий айтдилар: «Хуросонга бориб, Қутайба ибн Муслимнинг олдиларига кириб, сизга ҳадя олиб келдим, деб шу ҳадисни айтиб бердим. Қутайба ибн Муслим уловларига миниб, бозорга бориб, ушбу дуони айтдилар-да, сўнгра у ердан қўзғолдилар».

Имом Ҳоким Бурайдадан (р.а.) қилган ривоятларида: Расулуллоҳ соллаллоҳу алайҳи васаллам бозорга кирсалар:

 «Бисмиллоҳи, Аллоҳумма инний ас‘алука хойра ҳазиҳис суқи ва хойра ма фийҳа ва ауъзу бика мин шарриҳа ва шари ма фийҳа. Аллоҳумма инний ауъзу бика ан усийба фийҳа ямийнан фажира ав сафқатан хосира», деб айтдилар. (Маъноси: «Аллоҳнинг исми ила. Аллоҳим, Сендан бу бозорнинг яхшисини ва ундаги яхшиликларни сўрайман. Ва бу бозорнинг ёмонидан ҳамда ундаги ёмонликдан Сенинг номинг ила паноҳ тилайман. Аллоҳим, Сенинг номинг ила гуноҳга элтувчи қасамдан ва зарар келтирувчи битимдан паноҳ сўрайман».)