765/1. Абу Ҳурайрадан (р.а.) ривоят қилинади. Расулуллоҳ соллаллоҳу алайҳи васаллам: «Бирор қавм бир мажлисга ўтириб, Аллоҳ азза ва жаллани зикр қилмаса, унга ноқислик етади. Киши йўлда кета туриб Аллоҳ азза ва жаллани зикр қилмаса, унга ҳам ноқислик етади», дедилар. Ибн Сунний ривоятлари.
766/2. Абу Умома ал-Боҳилийдан (р.а.) ривоят қилинади. Расулуллоҳ соллаллоҳу алайҳи васаллам Табукдаликларида Жаброил алайҳиссалом келиб, «Эй Муҳаммад, Муовия ибн Муовия ал-Музанийнинг жанозаларида иштирок этинг», дедилар. Расулуллоҳ соллаллоҳу алайҳи васаллам бордилар. Ва Жаброил алайҳиссалом ҳам етмиш минг фаришта билан тушиб, ўнг қанотларини тоққа қўйганларида, у эгилди. Чап қанотларини ерга қўйганларида, у ҳам эгилди. Ҳаттоки, у зот Маккага ва Мадинага назар солдилар. У саҳобанинг жаноза намозларини Расулуллоҳ соллаллоҳу алайҳи васаллам, Жаброил алайҳиссалом ва фаришталар ўқишди. Қачонки, ундан фориғ бўлишганида, Расулуллоҳ соллаллоҳу алайҳи васаллам: «Эй Жаброил, Муовия нимаси сабабли бу мақомга ета олди?» деганларида, Жаброил алайҳиссалом: «Тик турганда ҳам, юриб кетаётганда ҳам, улов миниб кетаётганда ҳам, «Қул ҳуваллоҳу аҳад»ни қироат қилиб юриши сабаб бўлди», дедилар. Ибн Сунний ва Байҳақийлар ривоятлари.
|