Билингки, бу китобни фойдаси катта бўлган дуо-зикрлардан ташкил топган турли боблар ила тўлдирдим. Бу дуоларда тартиб лозим бўлмагани учун тартибламадим.

Билингки, бирор неъмат ҳосил бўлганда ёки бирор бало-офат кетганда, Аллоҳга шукр саждаси қилмоқ ва ҳамду сано айтмоқ маҳбуб амаллардандир. Бунга далил сифатида машҳур ҳадис ва асарлар кўпдир.

754/1. Амр ибн Маймун узун келган машварат ҳақидаги ҳадисда Умар ибн Хаттобнинг (р.а.) ўлимлари ҳақидаги қилган ривоятларида Умар (р.а.) ўғиллари Абдуллоҳни Оишанинг (р.а.) ҳузурларига икки дўстлари билан бирга дафн этишга изн беришларини сўраш учун юбордилар. Қачонки, Абдуллоҳ (р.а.) келгач, Умар (р.а.): «Бирор янгилик олиб келдингми?» деганларида, Абдуллоҳ (р.а.): «Эй мўминлар амири, сиз яхши кўрган нарсанинг изнини олиб келдим», дедилар. Шунда Умар (р.а.): «Алҳамдулиллаҳ, менга бундан кўра муҳимроқ нарса йўқ», дедилар. Имом Бухорий ривоятлари.