717/1. Оишадан (р.а.) ривоят қилинади. Расулуллоҳ соллаллоҳу алайҳи васаллам ҳузурларига ёш гўдак олиб келинса, унга дуо қилиб, танглайига хурмо қўйиб қўярдилар. Абу Довуд ривоятлари.

Бошқа бир ривоятда «Уларга барака тилаб дуо қилардилар», дейилган.

718/2. Асмо бинти Абу Бакрдан (р.а.) ривоят қилинади: «Абдуллоҳ ибн Зубайрга Маккада ҳомиладор бўлиб, Мадинага келгач, Қубога тушиб, ўша ерда туғдим. Сўнгра Расулуллоҳ соллаллоҳу алайҳи васаллам ҳузурларига олиб бордим. У зот тиззаларига қўйиб, хурмо олиб келишни буюрдилар. Бас, уни чайнаб, оғзига туфлаб қўйдилар. Боланинг қорнига биринчи кирган нарса Расулуллоҳ соллаллоҳу алайҳи васалламнинг муборак тупуклари бўлди. Сўнгра у зот хурмони танглайи тагига қўйиб, унга барака тилаб дуо қилдилар». Бухорий ва Муслим ривоятлари.

719/3. Абу Мусо ал-Ашъарийдан (р.а.) ривоят қилинади: «Мен ўғил кўрганимда, Расулуллоҳ соллаллоҳу алайҳи васаллам ҳузурларига олиб бордим. У зот унга Иброҳим деб исм қўйиб, танглайига хурмо қўйиб, унга барака тилаб дуо қилдилар». Бухорий ва Муслим ривоятлари.

Аммо Муслимнинг ривоятларида «... унга барака тилаб дуо қилдилар», деган лафз йўқ.