|
Болага еттинчи кунида ёки туғилган кунида исм қўймоқ суннатдир.
720/1. Амр ибн Шуъайбдан (р.а.), у зот оталаридан, оталари эса боболаридан қилган ривоятларида Расулуллоҳ соллаллоҳу алайҳи васаллам болага еттинчи куни исм қўйишга ва турли азият берувчи нарсаларни олишга ҳамда жонлиқ сўйишга буюрдилар. Термизий китобларида ривоят қилганлар.
721/2. Самура ибн Жундубдан (р.а.) ривоят қилинади. Расулуллоҳ соллаллоҳу алайҳи васаллам: «Ҳар бир бола туғилганида еттинчи куни жонлиқ сўйиб ақиқа қилинишига, сочи олдирилишига ва исм қўйилишига гаровдир», дедилар. (Яъни, булар ота-онанинг бурчларидир.) Абу Довуд, Термизий, Насаий ва Ибн Можалар ривояти.
Аммо туғилган куни исм қўйилишига юқоридаги Абу Мусодан (р.а.) ривоят қилинган 719-рақамли ҳадис далилдир.
722/3. Анасдан (р.а.) ривоят қилинади. Расулуллоҳ соллаллоҳу алайҳи васаллам: «Мен кечаларнинг бирида ўғил фарзанд кўрдим. Уни отамиз Иброҳим алайҳиссалом исмлари ила номладим», дедилар. Имом Муслим ривоятлари.
723/4. Анасдан (р.а.) ривоят қилинади: «Отам Талҳа ўғил фарзанд кўрганларида, мен уни Расулуллоҳ соллаллоҳу алайҳи васаллам ҳузурларига олиб бордим. У зот унинг танглайини кўтариб, хурмо қўйиб қўйдилар ва Абдуллоҳ деб исмладилар». Имом Бухорий ва Муслим ривоятлари.
724/5. Саҳл ибн Саъд ас-Саъидийдан (р.а.) ривоят қилинади. Мунзир ибн Абу Усайд туғилганларида, Расулуллоҳ соллаллоҳу алайҳи васаллам ҳузурларига олиб келинди. У зот болани тиззаларига ўтқаздилар. Оталари Абу Усайд эса ўлтирган эдилар. Расулуллоҳ соллаллоҳу алайҳи васаллам олдиларидаги нимагадир чалғидилар-да, болани унутиб қўйдилар. Шунда оталари Абу Усайд ишора қилган эди, бола Расулуллоҳ соллаллоҳу алайҳи васаллам тиззаларидан кўтариб олиб кетилди. Расулуллоҳ соллаллоҳу алайҳи васаллам аввалги ҳолга қайтиб, «Бола қани?» дедилар. Отаси: «Эй Расулуллоҳ, биз уни (ўз маконига) қайтариб юбордик», деди. Расулуллоҳ соллаллоҳу алайҳи васаллам: «Унинг исми нима?» деганларида, «Фалончи», дейилди. Шунда у зот: «Йўқ! Унинг исми Мунзирдир», дедилар. Шу кундан бошлаб унинг исми Мунзир бўлиб қолди. Имом Бухорий ва Муслим ривоятлари.
|
