587/1. Абдуллоҳ ибн Бусрдан (р.а.) ривоят қилинади: «Расулуллоҳ соллаллоҳу алайҳи васаллам отамнинг ҳузурига келганларида, биз бу зотга таом ва сути бор меш қўйганимизда, ундан тановул қилдилар. Сўнгра хурмо келтирилди. Ундан ҳам еб, данагини ўрта ва кўрсаткич бармоқларига жамлаб туриб улоқтириб юбордилар. Сўнгра ичимлик келтирилганида, ундан ҳам ичдилар. Ичиб бўлиб, ўнг томонларига узатдилар. Шунда отам у зотнинг уловлари юганидан ушлаб туриб: «Эй Расулуллоҳ, бизни дуо қилинг», деганларида, Расулуллоҳ соллаллоҳу алайҳи васаллам:

 «Аллоҳумма борик лаҳум фийма розақтаҳум вағфир лаҳум варҳамҳум», деб айтдилар». (Маъноси: «Аллоҳим, уларга ризқ қилиб берган нарсангни баракали қил, уларнинг гуноҳларини кечир, раҳм айла».) Имом Муслим ривоятлари.

588/2. Анасдан (р.а.) ривоят қилинади. Расулуллоҳ соллаллоҳу алайҳи васаллам Саъд ибн Убоданикига ифторлик қилгани борганларида, у нон ва ёғ келтирди. Расулуллоҳ соллаллоҳу алайҳи васаллам улардан тановул қилиб, сўнг:

 «Афтора ъиндакум соимуна ва акала тоъамакум ал-аброру ва соллат ъалайкум ал-малаикаҳ», деб айтдилар. (Маъноси: «Рўзадорлар сизларнинг ҳузурингизда ифтор қилишди. Яхшилар овқатларингиздан тановул қилишди. Ва фаришталар сизларга дуо қилишди».) Абу Довуд ривоятлари.

589/3. Абдуллоҳ ибн Зубайрдан ривоят қилинади. Расулуллоҳ соллаллоҳу алайҳи васаллам Саъд ибн Муоз ҳузурларида ифтор қилиб:

 «Афтора ъиндакум ас-соимуна...», деб айтдилар. (Маъноси: «Рўзадорлар сизларнинг ҳузурингизда ифтор қилишди».) Ибн Можа ривоятлари.

590/4. Бир киши Жобирдан (р.а.) ривоят қилиб айтди. Абул Ҳайсам ибн Таййихон Расулуллоҳ соллаллоҳу алайҳи васалламга таом ҳозирлаб, Расулуллоҳни ва саҳобаларини унга чақиртирди. Овқат тановул қилиб бўлингандан кейин Расулуллоҳ соллаллоҳу алайҳи васаллам: «Биродарларингизни мукофотлаб қўйинглар», дедилар. Саҳобалар: «Эй Аллоҳнинг расули, мукофотлаш қандай бўлади?» дейишганида, у зот: «Агар бирор кишининг уйига кириб, таомидан еб, ичимлигидан ичиб, унга дуо қилсангиз, ана шу мукофотлаш бўлади», дедилар. Абу Довуд ривоятлари.