Билингки, кеча ва кундузда ҳамда турли ҳолатлдарда муқим учун маҳбуб бўлган зикрлар мусофир учун ҳам мустаҳабдир. Лекин мусофирга булардан ташқари бироз қўшимча зикрлар ҳам бордир. Бу бобда ана шу қўшимчани зикр этишни мақсад қилганман. Бу боб катта бўлгани учун қисқартириб, муносиб бобларга ажратишни ихтиёр этдим. Буни бажаришда Аллоҳдан ёрдам сўраб, Унга таваккал қиламан.

Билингки, ким сафар қилишга шайланса, ҳолини тушунадиган, дини ва маърифати ишончли кишидан насиҳатини олиб, тажрибасини ўрганиб, маслаҳатлашмоғи лозим. Зеро, Аллоҳ таоло Оли Имрон сурасининг 159-оятида: «Ва ишларда уларга маслаҳат солинг», деб айтган. Бундан ташқари ҳам далиллар жуда кўпдир. Агар киши машварат қилиб, яхши бир маслаҳатни қўлга киритса, энди ана шу маслаҳатда Аллоҳга истихора қилади. Яъни, фарздан ташқари икки ракат намоз ўқиб, истихора дуосини айтади. Биз бу намоз ва дуо ҳақидаги маълумотларни китобнинг биринчи қисмида ўргандик.