52. Абу Ҳурайра розияллоҳу анҳудан ривоят қилинади:

«Расулуллоҳ соллаллоҳу алайҳи васалламнинг олдиларига бир киши келиб:

«Эй Аллоҳнинг расули! Менинг қариндошларим бор. Мен уларга силаи раҳм қиламан. Улар мендан алоқаларини кесадилар. Мен уларга яхшилик қиламан. Улар менга ёмонлик қиладилар. Мен уларга ҳалийм бўламан. Улар менга жоҳил бўладилар», деди.

«Агар ҳол сен айтгандек бўлса, уларга қизиган кул таом бўлади. Ўз ҳолингда бардавом бўлсанг, уларнинг зиддига Сен билан Аллоҳдан бир ёрдамчи доим бирга бўлади», дедилар».

53. Абдурроҳман ибн Авф розияллоҳу анҳудан ривоят қилинади:

«У киши Расулуллоҳ соллаллоҳу алайҳи васаллам қуйидагиларни айтганларини эшитган эканлар:

«Аллоҳ Азза ва Жалла:

«Мен Роҳманман. Раҳмни Мен яратганман ва унга Ўз исмимдан исм қўйганман. Ким уни боғласа, боғлайман. Ким уни кесса, кесаман», деган».

54. Абу Анбасдан ривоят қилинади:

«Мен Абдуллоҳ ибн Амрнинг Тоифдаги Ваҳд деган ерида ҳузурига кирдим. Бас, у:

«Расулуллоҳ соллаллоҳу алайҳи васаллам бизга бармоқларини кўрсатиб туриб, «Раҳм Роҳмандан олингандир. Ким силаи раҳм қилса, Аллоҳ ҳам унга силаи раҳм қилади. Ким силаи раҳмни кесса, Аллоҳ ҳам уни кесади. У(Раҳм)нинг қиёмат кунида тили жуда равон, сирғончиқ бўлади», дедилар».

55. Оиша розияллоҳу анҳодан ривоят қилинади:

«Пайғамбар соллаллоҳу алайҳи васаллам:

«Раҳм Романнинг исмидан олинган. Ким уни боғласа, Аллоҳ ҳам уни боғлайди. Ким уни кесса, Аллоҳ ҳам уни кесади», дедилар».