296. Жобир ибн Абдуллоҳ розияллоҳу анҳудан ривоят қилинади:

«Расулуллоҳ соллаллоҳу алайҳи васаллам:

«Эй Бани Салама! Сизнинг улуғингиз ким?» дедилар.

«Жадд ибн Қайс. Лекин бахиллиги бор», дедик.

«Бахилликдан ҳам ёмон дард борми? Саййидингиз Амр ибн Жамуҳдир», дедилар».

Амр жоҳилият даврида санамларига қараб турар эди. Расулуллоҳ соллаллоҳу алайҳи васаллам уйлансалар тўй қилиб берар эди».

297. Варрод розияллоҳу анҳудан ривоят қилинади:

«Муовия Муғийра ибн Шуъбага мактуб ёзиб:

«Менга Расулуллоҳ соллаллоҳу алайҳи васалламдан эшитган бирор нарсангни ёзиб юбор», деди.

Шунда Муғийра унга мактуб ёзиб:

«Расулуллоҳ соллаллоҳу алайҳи васаллам қийлу қолдан, молни исроф қилишдан, кўп саволдан, манъ қилиш ва бер-бер дейишдан, оналарга оқ бўлишдан, қизларни тириклай кўмишдан қайтарар эдилар», деди».

298. Жобир розияллоҳу анҳудан ривоят қилинади:

«Расулуллоҳ соллаллоҳу алайҳи васалламдан бирор нарса сўралса, ҳеч ҳам, йўқ, демаганлар».