192. Абу Ҳурайра розияллоҳу анҳудан ривоят қилинади:

«Расулуллоҳ соллаллоҳу алайҳи васаллам:

«Мамлукка таоми берилади, кийими берилади ва куч етмайдиган иш буюрилмайди», дедилар».

193. Абу Ҳурайра розияллоҳу анҳудан ривоят қилинади:

«Расулуллоҳ соллаллоҳу алайҳи васаллам:

«Мамлукнинг таомга, кийимга ҳаққи бор. Ва унга кучи етадиган иш буюрилади», дедилар».

194. Маърур ривоят қилади:

«Абу Заррнинг ҳузуридан ўтдик. Унда оддий кийим, ғуломида бош оёқ сарпо бор эди. Унга:

«Агар манавуни олиб, унга бошқасини берсанг, тўлиқ сарпо бўларди», дедик. Шунда у:

«Расулуллоҳ соллаллоҳу алайҳи васаллам: «Булар биродарларингиз. Аллоҳ уларни қўл остингизда қилиб қўйди. Кимнинг қўл остида биродари бўлса, унга ўзи еган таомдан едирсин, ўзи кийган кийимдан кийдирсин. Кучи етмайдиган ишни буюрмасин, буюрса, ўзи ёрдам берсин», деганлар», деди».