789. Зайд ибн Ваҳб розияллоҳу анҳудан ривоят қилинади:

«Ибн Масъуднинг «Албатта, сизлар фақиҳлари кўп, хатиблари оз, сўровчилари оз, берувчилари кўп замондасизлар. Унда амал ҳавойи нафсни етакловчидир. Сиздан кейин бир замон келади, унинг фақиҳлари оз, хатиблар кўп, сўровчилар кўп, берувчилар оз бўлади. Унда ҳавойи нафс амални етакловчидир. Билиб қўйингларки, албатта яхши ҳадю охир замонда баъзи бир амаллардан яхши бўлади», деганини эшитдим».

790. Журайрийдан ривоят қилинади:

«Абу Туфайлга:

«Набий соллаллоҳу алайҳи васалламни кўрганмисан?» дедим.

«Ҳа! Ер юзида мендан бошқа Набий соллаллоҳу алайҳи васалламни кўрган киши борлигини билмайман. У зот оппоқ ва чиройли юзли эдилар», деди».

Язид ибн Ҳорундан, Журайрийдан ривоят қилинади:

«Абу Туфайл (Омир ибн Воила Киноний) билан байтуллоҳни тавоф қилиб юрган эдик. Шунда Абу Туфайл:

«Мендан бошқа Набий соллаллоҳу алайҳи васалламни кўрган бирор киши қолмади», деди.

 «Сен У Зотни кўрганмисан?» дедим.

«Ҳа», деди.

«Қандай эдилар?» деди.

«Оппоқ, ёқимли ва ўрта бўйли эдилар», деди».

791. Ибн Аббос розияллоҳу анҳудан ривоят қилинади:

«Расулуллоҳ соллаллоҳу алайҳи васаллам:

«Солиҳ ҳидоят, чиройли кўриниш ва тежамкор бўлиш пайғамбарликнинг йигирма беш жузидан бир жуздир», дедилар».

Ибн Аббос розияллоҳу анҳудан ривоят қилинади:

«Расулуллоҳ соллаллоҳу алайҳи васаллам:

«Солиҳ ҳидоят, чиройли кўриниш ва тежамкор бўлиш пайғамбарликнинг етмиш жузидан бир жуздир», дедилар».