1794/1. Умму Саламадан р.а. ривоят қилинади. Расулуллоҳ с.а.в. : «Кумуш идишларда сув ичадиганлар қорнини дўзах оловига тўлдирибди», дедилар. Имом Бухорий ва Муслим ривоятлари.
Имом Муслимнинг ривоятларида «Тилла ва кумуш идишларда сув ичувчи ва овқатланувчилар» бўлиб келган.
1795/2. Ҳузайфадан р.а. ривоят қилинади. Расулуллоҳ с.а.в. ипак ва кимхоб кийишдан ҳамда тилла, кумуш идишларда сув ичишдан ман қилдилар. Ва: «Бу нарсалар бу дунёда кофирлар учун, охиратда эса сизлар учундир», дедилар. Имом Бухорий ва Муслим ривоятлари.
Икки «Саҳиҳ» китобида келган Ҳузайфа р.а. ривоятларида Расулуллоҳ с.а.в. : «Ипак ва кимхобдан тайёрланган кийимлар кийманглар, тилла, кумуш идишларда сув ичманглар ва тилла, кумуш тақсимчаларда овқат еманглар», деб айтдилар.
1796/3. Анас ибн Сийриндан ривоят қилинади: «Анас ибн Молик р.а. билан бирга бир неча мажусийлар ҳузурида ўтирганимизда, кумушдан ясалган идишда қиём олиб келинди. У зот бундан емадилар. Олиб келган кишига бу идишингни алмаштириб кел, деб айтилган эди, у киши кумуш идишни халанж дарахтидан ишланган косага алиштириб келди. Анас ибн Молик бу идишдаги қиёмдан тановул қилдилар». Имом Байҳаққий ҳасан иснод билан ривоят қилганлар.
|