1772/1. Нўъмон ибн Баширдан р.а. ривоят қилинади. Башир р.а. ўғиллари Нўъмонни Расулуллоҳ с.а.в. ҳузурларига олиб бориб: «Мен бу ўғлимга бир хизматкор бола ҳадя қилдим», деганларида, Расулуллоҳ с.а.в. : «Мана шу каби нарсани барча болаларингга ҳадя қилдингми?» дедилар. Башир р.а.: «Йўқ», дегандилар, Расулуллоҳ с.а.в. : «Берган нарсангни қайтариб ол», дедилар.
Бошқа ривоятда айтилишича, Расулуллоҳ с.а.в. : «Болаларингнинг барчасига шундай қилдингми?» деганларида, Башир: «Йўқ», дедилар. Шунда Расулуллоҳ с.а.в. : «Болаларингиз ҳақида адолатли бўлинглар», деб айтдилар. Кейин Башир келиб ҳалиги берган садақаларини қайтариб олдилар.
Яна бошқа ривоятда келтириладики, Расулуллоҳ с.а.в. : «Эй Башир! Сенда бундан бошқа фарзанд борми?» деганларида, Башир: «Ҳа», дедилар. Расулуллоҳ с.а.в. : «Фарзандларингнинг барчасига шундай ҳадя бердингми?» дегандилар, Башир: «Йўқ», дедилар. Шунда Расулуллоҳ с.а.в. : «Ундай бўладиган бўлса, мени гувоҳ қилмагин. Чунки мен зулмга гувоҳ бўлмайман», дедилар.
Яна бошқа бир ривоятда «Мени зулмга гувоҳ қилмагин» бўлиб келган. Бошқа ривоятда айтилишича, Расулуллоҳ с.а.в. : «Бу ишингга мендан бошқани гувоҳ қил», деб, кейин «Болаларинг сенга яхшилик ва хизмат қилишда баробар бўлишлари хурсанд қиладими?» дегандилар, Башир р.а.: «Ҳа», дедилар. Шунда Расулуллоҳ с.а.в. : «Ундай бўлса, уларни ажратмасдан баробар тутгин», дедилар. Имом Бухорий ва Муслим ривоятлари.
|