Аллоҳ таоло: «Зинокор аёл ва зинокор эркак – улардан ҳар бирини юз даррадан уринглар. Агар сизлар Аллоҳга ва охират кунига иймон келтиргувчи бўлсангизлар, Аллоҳнинг (бу) ҳукмида (яъни, зинокорларни дарралашда) сизларни уларга нисбатан раҳм-шафқат (туйғулари) тутмасин» (Нур сураси, 2-оят), деб айтган.

1769/1. Оишадан р.а. ривоят қилинади. Махзумия қабиласидаги бир аёлнинг ўғирлик қилгани қурайшликларни ғамга солиб қўйди. Шунда улар: «Ким Расулуллоҳ  с.а.в.  билан (у аёл жазосининг ижро этилмаслиги ҳақида) гаплашади?» дейишганида, баъзилари: «Усома ибн Зайд бориб гаплашади. Чунки уни Расулуллоҳ  с.а.в.  яхши кўрадилар», дейишди. Бас, Усома р.а. шафеълик қилиб, бу ҳақда Расулуллоҳ  с.а.в.  билан гаплашганларида, у зот  с.а.в. : «Аллоҳнинг ҳадларидан бўлган бир ҳадда, яъни жазосида шафеълик қиласанми?» дедилар-да, ўринларидан туриб қуйидагича хутба айтдилар: «Сизлардан олдинги умматларнинг ҳалок бўлишларига сабаб ораларида улуғ бир киши ўғирлик қилиб қўйса, жазони тарк қилишар, заиф, оддий одам ўғирлик қилса, ҳад (жазо)ни ижро этишар эди. Аллоҳ номига қасамки, Муҳаммаднинг қизи Фотима ўғирлик қилса, унинг қўлини кесар эдим». Имом Бухорий ва Муслим ривоятлари.

Бошқа ривоятда айтилишича, Расулуллоҳ  с.а.в.  бу сўзни эшитганларида ғазаблари келганидан юзлари ўзгариб кетди. Ва: «(Эй Усома), сен Аллоҳнинг жазосида ўртага тушиб шафеълик қилмоқчимисан?» деганларида, Усома р.а.: «Эй Расулуллоҳ, менинг гуноҳимга истиғфор айтинг», дедилар. Кейин бу хотинга ҳукм ижро этишни буюрдилар ва унинг қўли (ўғирлик қилгани учун) кесилди.