1361/1. Ибн Умардан р.а. ривоят қилинади. Расулуллоҳ  с.а.в. : «Албатта хизматкор хожаси ишларини чиройли суратда бажариб, Аллоҳга ибодатини ҳам яхши адо этса, унга иккита ажр берилади», дедилар. Имом Бухорий ва Муслим ривоятлари.

1362/2. Абу Ҳурайрадан р.а. ривоят қилинади. Расулуллоҳ  с.а.в. : «Солиҳ хизматкор учун икки ажр бор», дедилар. «Абу Ҳурайранинг жони Унинг қўлида бўлган Зотга қасамки, агар Аллоҳ йўлидаги жиҳод, ҳаж қилиш ва онамга яхшилик қилиш бўлмаганида эди, мен қул бўлиб ўлишни яхши кўрар эдим», дедилар. Имом Бухорий ва Муслим ривоятлари.

1363/3. Абу Мусо ал-Ашъарийдан р.а. ривоят қилинади. Расулуллоҳ  с.а.в. : «Раббига чиройли ибодат қилиб, хожасининг ҳаққини адо этишда хайрихоҳ ва итоатда бўлса, унга иккита ажр бордир», дедилар. Имом Бухорий ривояти.

1364/4. Абу Мусо ал-Ашъарийдан р.а. ривоят қилинади. Расулуллоҳ  с.а.в. : «Уч тоифа кишилар борки, улар учун икки ажр бор: ўзи аҳли китоб бўлиб, набийсига, кейин Муҳаммад алайҳиссаломга иймон келтирган кишига ва Аллоҳнинг ҳаққи ва хожасининг ҳаққини адо этган қулга ҳамда хизматкор қизни тарбиясига олиб, унга чиройли одоб, яхши таълим бериб, кейин уни озод қилиб турмушга узатган кишига иккита савоб бор», дедилар. Имом Бухорий ва Муслим ривоятлари.