1195/1. Абу Ҳурайрадан р.а. ривоят қилинади. Расулуллоҳ  с.а.в. : «Агар умматимга ёки одамларга машаққат бўлмаганида, ҳар бир намозда мисвок  қилишни буюрар эдим», дедилар. Имом Бухорий ва Муслим ривоятлари.

1196/2. Ҳузайфадан р.а. ривоят қилинади. Расулуллоҳ  с.а.в.  агар уйқудан турсалар, оғизларини мисвок билан тозалардилар. Имом Бухорий ва Муслим ривоятлари.

1197/3. Оишадан р.а. ривоят қилинади. Биз Расулуллоҳ  с.а.в.  ишлатишлари учун мисвок ва таҳорат сувларини тайёрлаб қўяр эдик. Аллоҳ у зотни қачон турғизишни хоҳласа, у зот туриб, оғизларини мисвок билан тозалаб, таҳорат қилиб, намоз ўқирдилар. Имом Муслим ривоятлари.

1198/4. Анасдан р.а. ривоят қилинади. Расулуллоҳ  с.а.в. : «Мен сизларга мисвокнинг фойдаси ҳақида кўп гапирдим», деб айтдилар. Имом Бухорий ривоятлари.

1199/5. Шурайҳ ибн Ҳонеъдан р.а. ривоят қилинади. Мен Оишага р.а.: «Расулуллоҳ  с.а.в.  агар уйларига кирсалар, қайси амалдан бошлар эдилар?» десам, Оиша р.а.: «Мисвокдан», деб айтдилар. Имом Муслим ривоятлари.

1200/6. Абу Мусо ал-Ашъарийдан р.а. ривоят қилинади. Мен Расулуллоҳ  с.а.в.  ҳузурларига кирсам, мисвокнинг олди тарафи муборак тиллари устида экан. Имом Бухорий ва Муслим ривоятлари. Бу лафз имом Муслимники.

1201/7. Оишадан р.а. ривоят қилинади. Расулуллоҳ  с.а.в. : «Мисвок оғизни тозалаб, Аллоҳни рози қилур», дедилар. Имом Насаий ва Ибн Ҳзайма ривоятлари.

1202/8. Абу Ҳурайрадан р.а. ривоят қилинади. Расулуллоҳ  с.а.в. : «Фитрат бештадир ёки беш нарса фитратдандир. 1. Хатна қилмоқ; 2. Киндик ости тукларини олмоқ; 3. Тирноқларни қисқартирмоқ; 4. Қўлтиқ ости тукларини тозаламоқ; 5 Мўйловни қисқартирмоқ», дедилар. Имом Бухорий ва Муслим ривоятлари.

 1203/9. Оишадан р.а. ривоят қилинади. Расулуллоҳ  с.а.в. : «Фитрат ўнтадир», дедилар. Улар: 1. Мўйловни қисқартириш; 2. Соқол қўйиш; 3. Мисвок ишлатиш; 4. Бурунга сув олиш; 5. Тирноқларни қисқартириш; 6. Бармоқлар орасини ювмоқ; 7. Қўлтиқ тукларини тозаламоқ; 8. Киндик ости тукларини тозаламоқ; 9. Истинжо қилмоқ. «Ўнинчисини унутдим. Оғизга сув олиш бўлса керак», деб шу ҳадис ровийларидан бири Вакийъ р.а. айтганлар. Имом Муслим ривоятлари.

1204/10. Ибн Умардан р.а. ривоят қилинади. Расулуллоҳ  с.а.в. : «Мўйловларни қисқатириб, соқолларни қўйиб юборинглар», деб айтдилар. Имом Бухорий ва Муслим ривоятлари.

 (Фитрат — хилқат. Бу ерда қадимги пайғамбарлар суннати, одати тушунилади – Тарж).