1127/1. Зайд ибн Собитдан р.а. ривоят қилинади. Расулуллоҳ  с.а.в. : «Эй инсонлар, уйларингизда ҳам намоз ўқинглар. Чунки кишининг фарз намозларидан ташқари энг афзал намози уйда ўқиган намозидир. Лекин фарз намозларини масжидда ўқиш афзалдир», дедилар. Имом Бухорий ва Муслим ривоятлари.

Фойда: Нафл намозларини уйда ўқишнинг маҳбублиги аён бўлмоқда. Чунки шундай қилиш риёдан узоқлаштириб, хонадонга барака олиб келишга сабаб бўлади.

1128/2. Ибн Умардан р.а. ривоят қилинади. Расулуллоҳ  с.а.в. : «Баъзи намозларингизни уйларингизда ҳам ўқиб туринглар. Уйларингизни қабристон қилиб олмангизлар (яъни ҳеч қандай амал қилиш мумкин бўлмаган қабристон каби қилиб олманглар)», деб айтдилар. Имом Бухорий ва Муслим ривоятлари.

1129/3. Жобирдан р.а. ривоят қилинади. Расулуллоҳ  с.а.в. : «Сизлардан бирортангиз масжидда намоз ўқиб бўлса, уйидаги намоздан бўлган насибасини ҳам қолдирсин. Чунки Аллоҳ таоло уйдаги намозидан хонадонидагиларга яхшилик ато қилади», дедилар. Имом Муслим ривоятлари.

1130/4. Умар ибн Атодан р.а. ривоят қилинади. Нофеъ ибн Жубайр р.а. бу зотни Соиб ибн Ухти Намир р.а. ҳузурларига Муовиянинг намозлари ҳақидаги фикрларини сўраб келишга юбордилар. Соиб р.а.: «Ҳақиқатда мен Муовия билан масжиднинг ёнидаги хонада жума намози ўқидим. Имом салом бериб намозни тугатганида, мен жойимда намознинг қолганини ўқидим. Муовия кириб, менга бир одамни юбориб: «Бу қилган ишингни такрорлама. Агар жумани ўқиб бўлсанг, то бирор киши билан гаплашмагунча ёки у ердан чиқиб кетмагунча, намозни ўқимагин. Чунки Расулуллоҳ  с.а.в.  бирор киши билан гаплашилмагунча ёки у ердан чиқиб кетилмагунча намозни бошқа намозга уламасликка буюрдилар», деб айтдилар. Имом Муслим ривоятлари.

Фойда: Фарз намозлари билан нафл ва бундан бошқа намозларни орасини, сўзлашиш ёки фарз ўқиган ўрнини ўзгартириш ёки масжиддан уйига чиқиб кетиш билан ажратиш, суннат амалдир.