1- Яҳё ибн Яъмар айтди:
«Абдуллоҳ ибн Умарга:
«Эй Абу Абдурроҳман, баъзи бир қавмлар қадар йўқ, деб ўйламоқдалар», дедим. У киши:
«Бизнинг орамизда улардан бирор кимса борми?» деди. Мен:
«Йўқ», дедим. У киши:
«Агар уларни учратсанг, уларга мендан етказгинки, Ибн Умар сизлардан Аллоҳга, сизларга эса ўзидан бароат эълон қилди», деди. Сўнгра шундай деди:
«Умар ибн Хаттоб айтди: «Росулуллоҳ соллаллоҳу алайҳи васалламнинг ҳузурларида одамлар орасида ўтирган эдик. Тўсатдан бир киши келди. Унда сафарнинг сиёқи кўринмас, шаҳар аҳолисидан ҳам эмас эди. (Одамларни) ҳатлаб ўтиб, Росулуллоҳ соллаллоҳу алайҳи васалламнинг рўпараларига келиб ўтирди-да:
«Эй Муҳаммад, Ислом нима?» деди. Росулуллоҳ соллаллоҳу алайҳи васаллам:
«Ислом: «Лаа илаҳа иллаллоҳу Муҳаммадур Росулуллоҳ» деб шаҳодат келтирмоғинг, намозни тўкис адо қилмоғинг, закот бермоғинг, Байтни ҳаж қилмоғинг ва умра қилмоғинг, жанобатдан ғусл қилмоғинг, таҳоратни мукаммал қилмоғинг, Рамазон рўзасини тутмоғинг», дедилар. У:
«Ушбуларни бажарсам, мусулмон бўламанми?» деди. У зот соллаллоҳу алайҳи васаллам:
«Ҳа», дедилар.
«Тўғри айтдинг», деди у».
Сўнг (ибн Умар) иймон, эҳсон, Соат (Қиёмат) ҳақидаги узун ҳадисни зикр қилди.