14. Анас розияллоҳу анҳудан ривоят қилинади: «Росулуллоҳ соллаллоҳу алайҳи васаллам ҳожатга чиқмоқчи бўлсалар, ерга яқинлашмагунларича кўйлакларини кўтармасдилар». Абу Ийсо: «Бу ҳадисни Аъмаш Анас розияллоху анхудан ривоят қилганлар. Аъмаш яна бу ҳадисни ибн Умар розияллоҳу анҳудан ривоят қилганлар: «Росулуллоҳ соллаллоҳу алайҳи васаллам ҳожатга чиқмоқчи бўлсалар, ерга яқинлашмагунларича кўйлакларини кўтармасдилар. Бу икки ҳадис ҳам мурсалдир. Чунки Аъмаш Анас розияллоҳу анҳу ёки бошқа бирорта саҳобадан ҳам ҳадис эшитмаганлар, лекин Анас розияллоҳу анҳуни кўрганлар. «Намоз ўқиётганларини кўрганман», деганлар ва у кишидан намоз ҳақида бир ҳикоя келтирганлар (эслаганлар).
|