Ибн Аббос (розияллоҳу анҳу)дан ривоят қилинади:
“Умму Фазл у кишининг «Вал мурсалати урфа»ни қироат қилаётганини эшитиб:
“Эй, ўғлим, Аллоҳга қасамки, ушбу сурани қироат қилишинг ила батаҳқиқ Расулуллоҳ соллаллоҳу алайҳи васалламдан охирги эшитган нарсамни эслатдинг. Уни шом намозида ўқиган эдилар”, деди”.

Жубайр ибн Мутъим (розияллоҳу анҳу) отасидан ривоят қилади. У шундай деди:
“Расулуллоҳ соллаллоҳу алайҳи васалламнинг шомда “Тур” (сураси)ни қироат қилганларини эшитдим”.

Марвон ибн Ҳакам шундай деди:
“Менга Зайд ибн Собит шундай деди:
“Нимага сен шом намозида қисқа муфассалдан ўқийсан. Батаҳқиқ, мен Расулуллоҳ соллаллоҳу алайҳи васалламнинг шом намозида иккита узуннинг узунини ўқиганларини кўрдим”.
У шундай деди:
“Мен:
“Иккита узуннинг узуни нима?” дедим. У:
“Аъроф ва наригиниси “Анъом”, деди.
У шундай деди:
“Ва мен Абу Мулайканинг ўғлидан сўрадим. У менга ўзи тарафдан:
“Моида” ва “Аъроф” деди”.