Абу Рофеъ розияллоҳу анҳудан ривоят қилинади: “Пайғамбар соллаллоҳу алайҳи васаллам бир куни хотинларини айланиб чиқдилар. Унисининг олдида ҳам, бунисининг олдида ҳам ғусл қилар эдилар. Мен у зот соллаллоҳу алайҳи васалламга: “Эй Аллоҳнинг Расули, ғуслни битта қилсангиз бўлмайдими?”- дедим. У киши: “Мана шуниси фойдалироқ, хушҳолроқ ва покроқ”, дедилар”. Абу Довуд айтади: “Анас розияллоҳу анҳунинг ҳадиси бу ҳадисдан кўра саҳиҳроқдир”.
Абу Саид ал-Худрий розияллоҳу анҳу Набий соллаллоҳу алайҳи васалламдан ривоят қилади. Набий соллаллоҳу алайҳи васаллам шундай дедилар: “Агар сизларнинг бирингиз аҳлига борса, сўнгра яна бошидан қайта қўшилмоқчи бўлса, бас у иккиси ўртасида бир таҳорат қилиб олсин”.
|