Оиша розияллоҳу анҳодан ривоят қилинади: “Набий соллаллоҳу алайҳи васаллам бир соъ (сув) билан ғусл қилиб, бир мудд (сув) билан таҳорат қилар эдилар”. (“Соъ”– 2,75 литр сув сиғадиган идиш. Бир муд сув эса 0,688 литр бўлади. Тарж.)
Жобир розияллоҳу анҳудан ривоят қилинади. У киши шундай дедилар: “Расулуллоҳ соллаллоҳу алайҳи васаллам бир соъ (сув) билан ғусл қилиб, бир мудд (сув) билан таҳорат қилар эдилар”.
Ҳабиб ал-Ансорий шундай деди: “Аббод ибн Тамимдан эшитдим. У момосидан ривоят қилади. Момоси умму Уморадир: “Набий соллаллоҳу алайҳи васаллам таҳорат қилдилар. Бир мудднинг учдан бири миқдорида сув бор идиш олиб келинди”.
Анас розияллоҳу анҳу шундай дедилар: “Набий соллаллоҳу алайҳи васаллам икки ратл (сув) сиғадиган идишда таҳорат қилардилар ва бир соъ (сув) билан ғусл қилардилар”. Абу Довуд шундай деди: “Бу ҳадисни Яҳё ибн Одам Шарикдан ривоят қилган, у: “Ибн Жабр ибн Атикдан ривоят қилган”, деди. Суфён Абдуллоҳ ибн Ийсодан ривоят қилган. У: “Менга Жабр ибн Абдуллоҳ айтиб берди”, деди”.
Абу Довуд шундай деди: “Шуъба буни ривоят қилиб айтади: “Менга Абдуллоҳ ибн Абдуллоҳ ибн Жабр Анасдан розияллоҳу анҳудан эшитдим деб айтиб берган”. Фақат у икки ратлни зикр қилмай, “маккук билан таҳорат қилар эдилар”, деган. (Маккук бир ярим соъ сув сиғадиган ўлчов идиши. Тарж.) Абу Довуд шундай деди: “Аҳмад ибн Ҳанбалнинг, соъ беш ратлдир, деганини эшитдим. У ибн Абу Зеъбнинг соъси ва у Набий соллаллоҳу алайҳи васаллам нинг соъси”.
|