Оиша розияллоҳу анҳодан ривоят қилинади. У киши шундай дейдилар:
“Расулуллоҳ соллаллоҳу алайҳи васаллам:
“Ўн нарса фитратдан (соф табиатдан)дир; мўйлабни қисқартириш, соқолни ўстириш, мисвок, бурунга сув олиб тозалаш, тирноқларни олиш, бўғинларнинг бужмайган жойларини ювиш, қўлтиқ (туки)ни юлиш, қовуқ (туки)ни қириш, истинжо қилиш”.
Закариё айтади:
“Мусъаб, ўнинчисини унутдим, оғизни чайиш бўлса керак”, деди”.

Мусо ибни Исмоил ва Довуд ибни Шабиблар бизга айтиб беради...
Мусо дадасидан (яъни Муҳаммад ибни Аммор ибни Ёсирдан), Довуд эса Аммор ибни Ёсирдан (яъни бобосидан)  ривоят қилиб айтади:
“Албатта Расулуллоҳ (с.а.в.) шундай дедилар:
“Дарҳақиқат мазмаза (оғизни чайиш) ва истиншоқ (бурунни сув билан чайиш) фитратдандир”.
Аммор ибни Ёсир аввалги Оиша онамиз ҳадисдагиларни зикр қилди, ундаги “соқолни ўстириш” ни келтирмай, “хатна қилиш” ни зиёда қилди. “Кийимга сув сепиш” ни айтиб, “сув билан истинжо қилиш” ни зикр қилмади.
Абу Довуд айтади:
“Бу ҳадисга ўхшаши ибни Аббосдан ҳам ривоят қилинган. Ва у (фитратни) бештаси бошга тегишли эканлигини айтган. Унда  “фарқ очиш” ни зикр қилиб, “соқол ўстириш”ни айтмаган”.
Абу Довуд айтади:
“Ҳаммоднинг ва Мужоҳиднинг Толқ ибни Ҳабибдан ва Бакр ибни Абдуллоҳ ал-Музанийдан ушбу ҳадисга ўхшаш ривоят қилингани уларнинг ўз сўзларидир. Улар “соқол ўстириш” ни зикр қилишмаган. Муҳаммад ибни Абдуллоҳ ибни Абу Марям Абу Саламадан, у Абу Ҳурайрадан ривоят қилган ҳадисда ҳам “соқол ўстириш” ни зикр қилмаган. Иброҳийм ан-Нахаийдан ривоят қилинган шунга ўхшаш ҳадисда “соқол ўстириш” ва “хатна қилиш” ни зикр қилган”.