Беш юз   йигирма учинчи ҳадис

Абу Ҳанифа (р.а.) Исмоилдан, у Абу Солиҳдан, у Умму Ҳонийдан ривоят қилади. Умму Ҳоний (р.а.) айтдилар: «Расулуллоҳ (с.а.в) бундай дедилар: «Қиёмат пушаймонлик ва ҳасрат кунидир».

Беш юз   йигирма тўртинчи ҳадис

Абу Ҳанифа (р.а.) Исмоилдан, у Абу Солиҳдан, у Умму Ҳонийдан (р.а.) ривоят қилади. Расулуллоҳ (с.а.в.) бундай деб айтдилар: «Жаннатда Аллоҳ ўткир мушкдан, суви салсабил, дарахтлари нурдан, ичида ҳар бирининг етмиш кокили бор гўзал ҳурлар айланиб юрадиган шаҳар яратган. У ҳурлардан биттаси ер юзида кўрилса эди, ғарб ва шарқни ёритар эди. Унинг хушбўй ҳиди осмон ва ер юзини тўлдирар эди.

 Сўрашди:

 - Ё Расулуллоҳ!.. Бу (шаҳар. - Тарж) ким учун?

 - Бу оладиган қарзини хушмуомалалик ва юмшоқлик ила сўраган киши учундир, - дея марҳамат қилдилар Расули Акрам (с.а.в.)».

Бир ривоятда: «Шояд бу ҳурлардан биттаси кўринсайди, ғарб билан шарқ орасини ёритарди. Осмон ва ер у муаттар ҳид билан тўлар эди», дейилади.

Яна бир ривоят: «Умму Ҳоний бундай деди: «Ҳазрати Пайғамбар (с.а.в) марҳамат қилдилар: «Аллоҳнинг арши остида очилган ўткир мушкдан яратилган бир шаҳри бор. У шаҳарнинг дарахтлари нурдир. Суви салсабилдир. Йирик кўзли ҳурлар яратиб қўйилган. Ҳар бири етмиш кокиллидир. Улардан бирортаси шарқда бўлса ҳам, ғарбни ёруғ қилар эди».