Уч юз қирқ тўққизинчи ҳадис

Абу Ҳанифа (р.а.) Абу Муҳаммаддан ривоят қилади. Абу Муҳаммад айтди: «Ибн Саид ибн Жаъфар Сулаймон ибн Абдуллоҳдан ривоят этиб, менга Расулуллоҳнинг (с.а.в.): «Қўшни шуфаъга ҳақлидир» (Шуфаъ - кўчмас мулкни айтмай сотганда харидордан тортиб сотиб олиш. - Тарж.) деганларини ёзиб юборди».

Уч юз эллигинчи ҳадис

Абу Ҳанифа (р.а.) Абдулкаримдан, у Мисвар ибн Махрамадан ривоят қилади. Мисвар ибн Махрама айтди: «Саъд уйини сотмоқчи бўлганида қўшнисига бундай деди:

- Менга уйим учун саккиз юз дирҳам беришмоқчи, уйимни сен етти юз дирҳамга ол. Уни сенга бераман, чунки Расулуллоҳдан (с.а.в.): «Қўшни шуфаъни олмоққа энг кўп ҳақ соҳибидир», деб эшитганман.

Мисвар, Рофиъ ибн Ҳудайждан қилган бошқа ривоятда Рофиъ ибн Ҳудайж айтди: «Саид менга бир уй кўрсатиб: «Шу уйни сен сотиб ол. Бу уй учун менга сен берадиган пулдан кўпроқ беришмоқчи. Лекин сен уни олишга ҳақлисан. Чунки мен Расулуллоҳнинг (с.а.в.): «Қўшни шуфаъни олишга энг кўп ҳақдордир», деганларини эшитганман, деди».

Мисвар, Саъднинг қули Рофиъдан қилган яна бир ривоятда: Рофиъ Саъдга бундай деди: «Бу уйимни тўрт юз дирҳамга сен ол. Менга саккиз юз дирҳам берамиз, дейишди. Бироқ мени уни сенга сотмоқчиман. Зеро, Расулуллоҳдан (с.а.в.): «Қўшни шуфаъга ҳақлидир», деганларини эшитганман.

Саъд ибн Моликдан қилинган бошқа бир ривоятда шундай келган: Саъд уйини қўшнисига тўрт юз дирҳамга сотишни таклиф қилди ва менга бу уй учун саккиз юз дирҳам берадиган бўлишди. Лекин мен Расулуллоҳдан (с.а.в.): «Қўшни шуфаъга ҳақлидир», деганларини эшитганман.

Уч юз эллик биринчи ҳадис

Абу Ҳанифа (р.а.) Али ибн Ақмардан, у Масруқдан, у Оиша онамиздан (р.а.) ривоят қилади. Оиша онамиз (р.а.) айтдилар: «Сиздан бирингизнинг қўшниси деворига ёғоч қўймоқчи бўлса, тўсқинлик қилмасин».