(844) 1. Абдуллоҳдан (р.а.) ривоят қилинади. Расулуллоҳ (с.а.в.): "Агар сизлардан бирингиз жумага келмоқликни хоҳласа ғусл қилсин", дедилар.
(…) 2. Абдуллоҳ ибн Умардан (р.а.) ривоят қилинади. Расулуллоҳ (с.а.в.) минбарда тик туриб: "Сизлардан кимингиз жумага келса ғусл қилсин", дедилар. Бу ерда юқоридаги ҳадис икки марта такрор келган.
(845) 3. Солим ибн Абдуллоҳ оталаридан (р.а.) ривоят қиладилар. Умар ибн Хаттоб жума куни одамларга хутба айтаётган пайтларида Расулуллоҳ (с.а.в.) саҳобаларидан бир киши кириб келди. Умар (р.а.) уни чақириб: "Бу қайси пайт", дегандилар, у: "Бугун машғул бўлиб қолдим. Аҳлимга келган заҳоти азонни эшитиб қолдим. Бошқа ҳеч нарсага машғул бўлмай таҳорат олдим", деди. Шунда Умар (р.а.): "Таҳоратни ўзими? Билмасмидинг, Расулуллоҳ (с.а.в.) ғусл қилишга ҳам буюрардилар", деб айтдилар.
(…) 4. Абу Ҳурайрадан (р.а.) ривоят қилинади. Жума куни Умар ибн Хаттоб одамларга хутба айтаёгандилар. Шу пайт Усмон ибн Аффон кириб қолдилар. Умар (р.а.) у кишига юзланиб: "Кишиларга нима бўлдики, азондан кейин кечикиб қолишади", дедилар. Усмон (р.а.): "Эй мўминларнинг амири! Азонни эшитган пайтда ҳеч нарсага қўл урмасдан фақат таҳорат олдим-да, ўша заҳоти бу ёққа келдим", дегандилар, Умар (р.а.): "Таҳоратни ўзими? Расулуллоҳ (с.а.в.)ни "Агар сизлардан бирингиз жумага келса ғусл қилсин", деганларини эшитганмидинглар?" дедилар.
|