(782) 215. Оишадан (р.а.) ривоят қилинади. Расулуллоҳ (с.а.в.) нинг бир бўйралари бўлиб, тунда уни тўсиб қўйиб намоз ўқирдилар. Одамлар ҳам у зотга қўшилиб намоз ўқишар эди. Кечаларнинг бирида яна тўпланиб қолишди. Шунда у зот: "Эй одамлар! Тоқатингиз етадиган ишларни ўзингиз лозим тутинг. Чунки сизларга малол келмагунча Аллоҳга малол келмайди. Албатта Аллоҳ таолога амалларнинг маҳбуби оз бўлса ҳам бардавом бўлганидир", дедилар.
Муҳаммад (с.а.в.) оилалари агар бирор иш қилишса уни бардавом қилишар эди.

(…) 216. Оишадан (р.а.) ирвоят қилинади. Расулуллоҳ (с.а.в.) дан қайси амал Аллоҳга маҳбуброқ? Деб сўралганида, у зот: "Агар оз бўлса ҳам бардавом бўлгани", дедилар.

(783) 217. Алқамадан (р.а.) ривоят қилинади. Мўминлар онаси Оишадан: "Эй мўминлар онаси! Расулуллоҳ (с.а.в.) нинг амаллари қандай бўлган эди. У зот кунларнинг қайсидир бирида хос қилиб олардиларми?" деб сўрасам, Оиша (р.а.): "Йўқ у кишининг амаллари бардавом бўлар эди. Сизларнинг қайси бирингиз Расулуллоҳ (с.а.в.) қодир бўлган нарсага қурби етар эди?" дедилар.

(…) 218. Оишадан (р.а.) ривоят қилинади. Расулуллоҳ (с.а.в.): "Аллоҳ таолога амалларнинг маҳбуби оз бўлса ҳам бардавом бўлганидир", дедилар.
Оиша (р.а.) агар бир амал қилгудек бўлсалар уни бардавом бажаришни лозим топардилар.

(784) 219. Анасдан (р.а.) ривоят қилинади. Расулуллоҳ (с.а.в.) масжидга кирсалар икки устун оралигида арқон тортиб қўйилган экан. Бу нимаси? Дегандилар, одамлар: "Бу Зайнабга тегишли арқон. У намоз ўқиётганда дангаса ёки мадорсиз бўлиб қолса уни ушлаб (осилиб) олади", дейишди. Шунда у зот: "Уни ечиб юборинглар. Сизлардан бирингиз фаол турганида намоз ўқисин. Агар мадорсиз қолса ўтириб олсин", дедилар.
Бу ерда юқоридаги ҳадис такрор келган.

(785) 220. Оишадан (р.а.) ирвоят қилинади. Ҳавла бинти Тувайт ибн Ҳабиб ибн Асад ибн Абдулуззо Оиша (р.а.) олдларидан ўтиб қолдилар. Ҳузурларида Расулуллоҳ (с.а.в.) ҳам бор эдилар. Шунда мен: "Мана бу Ҳавла бинти Рувайтдир. У тунда ухламайди, деб тахмин қилишади", дедим. Расулуллоҳ (с.а.в.): "Тунда ухламайди? Сизлар тоқатингиз етган амални бажаринглар. Аллоҳ номига қасамки то сизлар малол кўрмагунингизча Аллоҳ ҳам малол кўрмайди", дедилар.

(…) 221. Оишадан (р.а.) ривоят қилинади. Олдимга Расулуллоҳ (с.а.в.) кирдилар. Ҳузуримда бир аёл бор эди. Бу ким? Дегандилар, мен: "Ухламасдан намоз ўқиб чиқадиган аёл", дедим. Шунда у зот: "Сизлар тоқатингиз етадиган амални бажаринглар. Аллоҳ номига қасамки, то сизларга малол келмагунча Аллоҳга ҳам малол келмайди. Аллоҳга диннинг энг яхшиси ўша ибодат соҳиби (бошлаган ибодатида) бардавом бўлганидир". Дедилар.
Усоманинг ҳадисида: "У Бани асадлик аёл эди", дейилган.