(710) 63. Абу Ҳурайрадан (р.а.) ривоят қилинади. Набий (с.а.в.) "Агар намозга азон айтилса фарз намозидан бошқа намоз йўқ", дедилар.

(…) 64. Абу Ҳурайрадан (р.а.) ривоят қилинади. Набий (с.а.в.): "Агар намозга азон айтилса фарз намозидан бошқа намоз йўқ", дедилар.
Бу ерда юқоридаги ҳадис икки марта такрор келган.

(711) 65. Абдуллоҳ ибн Молик ибн Буҳайнадан (р.а.) ривоят қилинади. Расулуллоҳ (с.а.в.) бомдодга такбир айтилганидан кейин ҳам намоз ўқиётган бир киши олдидан ўтиб, унга нимадир дедилар. Намоз ўқиб бўлингач биз уни ўрадик-да, Расулуллоҳ (с.а.в.) сенга нима дедилар, десак, у: "Яқин кунларда сизлардан бирингиз бомдодни тўрт ракат ўқийди, дедилар", деб айтди.
(Бу билан Расулуллоҳ (с.а.в.) бомдодни суннатини ҳам ўқийди демоқчилар. Лекин бизнинг Ҳанафия мазҳабимизда масжид хонақоҳининг ташқарисида суннатни ўқиш жоиз, агар фарзни иккинчи ракатига улгуришга кўзи етса. Бу иши билан суннат фазилати ҳамда жамоат фазилатини қўлга киритган бўлади… Тарж).
Абулҳусан Муслим: "Бу ҳадисда хатолик бор", деб айтдилар.

(…) 66. Ибн Буҳайнадан (р.а.) ривоят қилинади. Бомдод намозига такбир айтилганида Расулуллоҳ (с.а.в.) бир кишини намоз ўқиётганини кўрдилар. Муаззин эса такбир айтарди. Расулуллоҳ (с.а.в.): "Субҳ намозини тўрт ракат ўқияпсанми?" дедилар.

(712) 67. Абдуллоҳ ибн Сиржисдан (р.а.) ривоят қилинади. Бир киши масжидга кирди. У масжид ёнида икки ракат намоз ўқиди. Кейин кирдида Расулуллоҳ (с.а.в.) билан бирга (намоз) ўқиди. Расулуллоҳ (с.а.в.) салом бергач: "Эй фалончи! Бу икки намозингдан қайси бирига суянмоқдасан. Ўзинг якка ўқиганинггами ёки биз билан бирга ўқиган намозинггами?" дедилар.