Ибн Умар розияллоҳу анҳудан ривоят қилинади: «Расулуллоҳ соллаллоҳу алайҳи васаллам видолашув ҳажида умрадан ҳажга таматтуъ қилдилар ва ҳадйи атадилар. У зот ўз ҳадйиларини Зул-ҳулайфадан ҳайдадилар». Бухорий, Муслим.
Али розияллоҳу анҳудан ривоят қилинади: «Набий соллаллоҳу алайҳи васаллам юзта туяни ҳадйига атадилар. Бас, менга амр қилдилар ва уларнинг гўштларини тақсимладим. Кейин яна амр қилдилар ва жабдуқларини тақсимладим. Сўнг яна амр қилдилар ва териларини тақсимладим». Имом Бухорий ривоят қилган.
Марвон розияллоҳу анҳудан ривоят қилинади: «Набий соллаллоҳу алайҳи васаллам ҳудайбия замонида Мадинадан саҳобаларидан ўн неча юз киши билан чиқдилар. Токи улар Зул-ҳулайфага етиб келганларида Набий соллаллоҳу алайҳи васаллам ҳадйига белги тақдилар, уларнинг ўркачини тилдилар ва умрага эҳром боғладилар». Бухорий, Абу Довуд ва Аҳмад ривоят қилган.
Набий соллаллоҳу алайҳи васаллам пешинни Зул-ҳулайфада ўқидилар. Сўнгра бир туяни келтиришни амр қилиб, ўркачининг ўнг тарафидан тилиб белгиладилар. Кейин ундан қон оқиздилар. Уларнинг бўйнига бир жуфт кавш осиб нишонли қилдилар». Абу Довуд ва Термизий ривоят қилишган.
Оиша розияллоҳу анҳодан ривоят қилинади: «Набий соллаллоҳу алайҳи васалламнинг туяларига осиладиган нишонларнинг ипини икки қўлим билан титиб бердим. Сўнгра у зот уларга нишон осдилар, ўркачини тилдилар ва ҳадйи атадилар. У зотга ҳалол бўлган ҳеч бир нарса ҳаром бўлмади».
Бошқа бир ривоятда: «Набий соллаллоҳу алайҳи васалламнинг қўй нишонларининг ипини титиб берар эдим. У зот уларни бошқалар билан юборар ва ўзлари ҳалол бўлган ҳолларида қолар эдилар». Бухорий, Муслим, Абу Довуд, Термизий, Насаий.
|