Абдулазиз ибн Руфайъ розияллоҳу анҳудан ривоят қилинади: «Анас ибн Моликдан: «Менга Расулуллоҳ соллаллоҳу алайҳи васалламдан ақлинг олган нарса ҳақида хабар бер. У зот тарвия куни пешинни қаерда ўқидилар?» деб сўрадим. «Минода», деди. «Минодан Маккага тушиш куни асрни қаерда ўқидилар?» дедим. «Абтоҳда. Амирларинг нима қилса, шуни қил», деди. Бухорий, Муслим.
Анас розияллоҳу анҳудан ривоят қилинади: «Набий соллаллоҳу алайҳи васаллам пешин, аср, шом ва хуфтонни Муҳоссабда ўқидилар ва бир оз мизғиб олдилар. Сўнгра уловга миниб, Байтга бориб, тавоф қилдилар». Бухорий ва Абу Довуд ривоят қилишган.
«Набий соллаллоҳу алайҳи васаллам, Абу Бакр ва Умар Абтоҳга тушар эдилар». Муслим ва Термизий ривоят қилишган.
Абу Рофеъ розияллоҳу анҳудан ривоят қилинади: «Набий соллаллоҳу алайҳи васаллам Минодан чиққанларида менга Абтоҳга тушишимни амр қилмаган эдилар. Лекин мен келиб у ерга чодир қурдим ва у зот келиб тушдилар». Муслим ва Абу Довуд ривоят қилишган.
Абу Ҳурайра розияллоҳу анҳудан ривоят қилинади: «Биз Минода турганимизда Расулуллоҳ соллаллоҳу алайҳи васаллам бизга: «Биз эртага, иншааллоҳ, Бани Канонанинг ёнбағрига, куфрда собит бўлишга қасам ичишган жойларига тушамиз», дедилар. Бу ерда Қурайш ва Бани Канона бирга қасам ичиб, токи уларга Набий соллаллоҳу алайҳи васалламни топширмагунларича, Бани ҳошим ва Бани Мутталиб билан қиз олиб қиз бермасликка, савдо-сотиқ қилмасликка аҳдлашган эдилар». Бухорий, Муслим.
Оиша розияллоҳу анҳодан ривоят қилинади: «София Минодан қайтиш куни ҳайз кўриб қолди ва: «Менимча, сизларни ушлаб қолсам керак», деди. Шунда Набий соллаллоҳу алайҳи васаллам: «Жароҳат топиб, сочи қирилсин. Қурбонлик куни тавоф қилганмиди?» дедилар. «ҳа», дейилди. «Жўнайвер», дедилар». Бухорий, Муслим, Абу Довуд, Термизий, Насаий.
|