Ибн Аббос розияллоҳу анҳу:
«Набий соллаллоҳу алайҳи васаллам Мадина аҳлига Зул-ҳулайфани, Шом аҳлига Жуҳфани, Нажд аҳлига Қорнул-манозилни ва Яман аҳлига Яламламни мийқот қилдилар. Ўшалар у ерликларга ва ўша томондан келадиган улардан бошқа ҳаж ҳамда умрани ирода қилганларга мийқотдир. Ундан ичкарида бўлганлар қаердан жўнаса, ўша ердан эҳромга киради. Макка аҳли Маккадан», дедилар».
Бухорий, Муслим, Абу Довуд, Термизий, Насаий.

Яна ўша кишидан ривоят қилинади:
«Расулуллоҳ соллаллоҳу алайҳи васаллам машриқ аҳлига Ақийқни мийқот қилдилар».
Абу Довуд ва Термизий ривоят қилишган.

Аҳмад, Абу Довуд ва Насаийнинг ривоятида:
«Набий соллаллоҳу алайҳи васаллам Ироқ аҳлига Зоти ирқни мийқот қилдилар», дейилган.
Шарҳ: Зоти ирқ Ақийқдан кўра Маккаи мукаррамага яқинроқ жой. Баъзи уламолар, эҳтиёт учун Ақийқдан эҳром боғлаган афзал, дейдилар.

Ибн Умар розияллоҳу анҳудан ривоят қилинади:
«Икки шаҳар фатҳ қилинганида ҳазрати Умарнинг олдига келиб:
«Эй мўминларнинг амири! Расулуллоҳ соллаллоҳу алайҳи васаллам Нажд аҳлига Қорнни чегара қилиб берган эдилар. У бизнинг йўлимиздан узоқда. Агар уни ирода қиладиган бўлсак, бизга машаққат бўлади», дейишди.
«Унинг тўғрисига назар солинглар», деди ва уларга Зоти ирқни чегара қилиб берди».
Имом Бухорий ривоят қилган.