Савбон розияллоҳу анҳудан ривоят қилинадики:
«Набий соллаллоҳу алайҳи васаллам:
«Қон олувчининг ҳам, қон олдирувчининг ҳам рўзаси очилур», дедилар».
Бухорий, Абу Довуд, Термизий, Насаий.

Анасга:
«Набий соллаллоҳу алайҳи васалламнинг давр­ларида рўзадорнинг қон олдиришини ёмон кўрар эдингларми?» дейилди.
«Йўқ! Магар заифлик туфайли бўлсагина», деди».
Бухорий ва Абу Довуд ривоят қилишган.

Ибн Аббос розияллоҳу анҳудан ривоят қилинади:
«Набий соллаллоҳу алайҳи васаллам эҳром кийган ҳолларида қон олдирдилар, рўзадор ҳолларида қон олдирдилар».
Бухорий, Абу Довуд, Термизий, Насаий.
Бошқа бир ривоятда:
«Қайт қилган, эҳтилом бўлган ва қон олдирганнинг рўзаси очилмайди», дейилган.

Анас розияллоҳу анҳудан ривоят қилинади:
«Бир киши Пайғамбар соллаллоҳу алайҳи васалламга:
«Кўзим оғриб қолди. Рўзадор ҳолимда сурма қўйсам бўладими?» деди. У зот соллаллоҳу алайҳи васаллам:
«ҳа», дедилар».
Термизий ривоят қилган.

 «Набий соллаллоҳу алайҳи васаллам Рамазонда рўзадор ҳолларида сурма қўйганлар».
Ибн Можа ривоят қилган.

 «Анас розияллоҳу анҳу рўзадор ҳолларида сурма қўяр эдилар».
Аъмаш раҳматуллоҳи алайҳи:
«Асҳобларимиздан бирортасининг рўзадор ҳолда сурма қўйишни ёқтирмаганини кўрмадим», деди.
Икки ривоятни ҳам Абу Довуд келтирган.

 «Анас, Ҳасан ва Иброҳимлар рўзадор сурма қўйса, ҳеч нарса бўлмайди, деб билганлар».
Бухорий ривоят қилган.

 Пайғамбар соллаллоҳу алайҳи васалламнинг саҳобаларидан баъзиси:
«Батаҳқиқ, Расулуллоҳ соллаллоҳу алайҳи васалламнинг Аржда, рўзадор ҳолларида, иссиқ ва чанқоқликдан бошларидан сув қуяётганларини кўрдим», деди.
Абу Довуд, Насаий ва Аҳмад ривоят қилишган.