Анас розияллоҳу анҳудан ривоят қилинади:
«Бир жанозани олиб ўтилди. Унинг ҳақига яхши гаплар айтилди. Пайғамбар соллаллоҳу алайҳи васаллам, вожиб бўлди, вожиб бўлди, вожиб бўлди, дедилар.
Яна бир жанозани олиб ўтилди. Унинг ҳақида ёмон гаплар айтилди. Пайғамбар соллаллоҳу алайҳи васаллам, вожиб бўлди, вожиб бўлди, вожиб бўлди, дедилар. Умар розияллоҳу анҳу:
«Ота-онамиз сизга фидо бўлсин, нима вожиб бўлди?» деди.
Шунда Расулуллоҳ соллаллоҳу алайҳи васаллам:
«Ҳақида яхши гаплар айтган одамингизга жаннат вожиб бўлди. Ҳақида ёмон гаплар айтган одамингизга дўзах вожиб бўлди. Сиз Аллоҳнинг ер юзидаги шоҳидларисиз. Сиз Аллоҳнинг ер юзидаги шоҳидларисиз. Сиз Аллоҳнинг ер юзидаги шоҳидларисиз», дедилар».
Бухорий, Муслим, Абу Довуд, Термизий, Насаий ривоят қилган.
Насаийнинг лафзида:
«Фаришталар Аллоҳнинг осмондаги шоҳидларидир. Сиз Аллоҳнинг ер юзидаги шоҳидларисиз», дейилган.

Абул Асвад розияллоҳу анҳудан ривоят қилинади:
«Мадинага бордим. У ерда касаллик тарқалган экан. Умар розияллоҳу анҳунинг олдида ўтирдим. Уларнинг олдидан жаноза ўтди. Бас, унинг соҳибига мақтов айтилди. Умар, вожиб бўлди, деди. Сўнгра яна бошқаси ўтди. Унинг соҳибига ҳам мақтов айтилди Умар, вожиб бўлди, деди. Кейин учинчиси олиб ўтилди. Унинг соҳибига ёмон гап айтилди. Умар, вожиб бўлди, деди. Абул Асвад:
«Нима вожиб бўлди? Эй, амирал мўминин?» деди.
Пайғамбар соллаллоҳу алайҳи васаллам нима деган бўлсалар, шуни айтдим. Қайси бир мусулмонга тўртта одам яхшилик ила гувоҳлик берса, Аллоҳ уни жаннатга киритади», деди.
«Учта бўлса ҳамми?» дедим.
«Учта бўлса ҳам», деди.
«Иккита бўлса ҳамми?» дедим.
«Иккита бўлса ҳам», деди.
Битта ҳақида сўрамадик».
Бухорий, Термизий ва Насаий ривоят қилган.