Абу Ҳурайра розияллоҳу анҳудан ривоят қилинади: «Ким жанозага намоз ўқилгунча ҳозир бўлса, унга бир қийрот савоб, ким дафн қилунгунча ҳозир бўлса, унга икки қийрот савоб», дедилар». «Икки қийрот нимадир?» дейилди. «Икки улкан тоққа ўхшаш нарса», дедилар». Бухорий, Муслим, Абу Довуд, Термизий, Насаий ривоят қилган. Бошқа бир ривоятда: «Икковларидан кичиги Уҳудга ўхшаш», дейилган. Ибн Умар жанозага намоз ўқиб, қайтиб кетар эдилар. У кишига Абу Ҳурайранинг ҳадиси етганда: «Батаҳқиқ, кўплаб қийротларни зоеъ қилибмиз», деди».
Самура розияллоҳу анҳудан ривоят қилинади: «Пайғамбар соллаллоҳу алайҳи васалламнинг орқаларидан нифосида ўлган бир аёлга намоз ўқидим. Бас, у зот унинг ўртасида турдилар». Бухорий, Муслим, Абу Довуд, Термизий, Насаий ривоят қилган.
Абу Ғолиб розияллоҳу анҳудан ривоят қилинади: «Анас ибн Молик билан бир эр кишига жаноза ўқидим, у унинг бош томонида турди. Сўнгра қурайшлик бир аёлнинг жанозасини олиб келдилар. «Эй, Абу Ҳамза, бу(аёл)га жаноза ўқинг», дейишди. Бас, у тобутнинг ўртасига турди. Шунда унга ал-Аъло ибн Зиёд: «Пайғамбар соллаллоҳу алайҳи васалламнинг жанозада бу(аёл)да турган мақомингда ва эр кишида ҳам сен турган мақомда турганларини кўрганмисан?» деди. «Ҳа», деди Анас ибн Молик ва фориғ бўлгандан сўнг, «ёдлаб олинглар», деди». Термизий, Абу Довуд ва Аҳмад ривоят қилган.
|