Жобир розияллоҳу анҳудан ривоят қилинади:
«Пайғамбар соллаллоҳу алайҳи васаллам:
«Қачон бирортангиз ўз биродарини кафанласа, унинг кафанини яхшиласин», дедилар».
Муслим, Абу Довуд, Термизий, Насаий ривоят қилган.

Ибн Аббос розияллоҳу анҳудан ривоят қилинади:
«Пайғамбар соллаллоҳу алайҳи васаллам:
«Кийимларингиздан оқини кийинг. Албатта, у энг яхши кийимингиздир. Ўликларингизни ҳам ўшанда кафанланг», дедилар».
Термизий ва унинг икки соҳиби ривоят қилган.
Абу Довуднинг ривоятида:
«Кафанда ортиқчаликка йўл қўйманглар. Чунки, у тезда суғириб олинади», дедилар», дейилган.

Жобир розияллоҳу анҳудан ривоят қилинади:
«Расулуллоҳ соллаллоҳу алайҳи васаллам Ҳамза ибн Абдулматллибни йўл-йўл бир кийимга кафанладилар».
Термизий ривоят қилган.

«Пайғамбар соллаллоҳу алайҳи васалламни пахтадан бўлган уч кийим ила кафанлангани олдин ўтди».

Лайло бинти Қониф ас-Сақафийя розияллоҳу анҳодан ривоят қилинади:
«Пайғамбар соллаллоҳу алайҳи васалламнинг қизлари Умму Гулсум вафот этганида уни ювганлардан бири эдим. Пайғамбар соллаллоҳу алайҳи васаллам бизга аввал «ҳиқо» - лозим - ни, кейин «диръ» - кўйлак - ни, кейин «химор» - рўмол - ни, кейин «милҳафа» - паранжи - ни бердилар. Сўнг уни яна бошқа кийимга киритилди. Расулуллоҳ соллаллоҳу алайҳи васаллам эшикнинг олдида ўтириб олиб, унинг кафанини қўллари билан бизга битта-биттадан бериб турдилар».
Абу Довуд ва Аҳмад ривоят қилган.