Абдуллоҳ ибн Муғаффал розияллоҳу анҳудан ривоят қилинади:
«Пайғамбар соллаллоҳу алайҳи васаллам:
«Икки азоннинг орасида намоз бор», деб икки марта айтдилар. Сўнгра учинчисида:
«Ким хоҳласа», дедилар».
Бухорий, Муслим, Абу Довуд, Насаий ривоят қилган.

Абдуллоҳ ал-Музаний розияллоҳу анҳудан ривоят қилинади:
«Пайғамбар соллаллоҳу алайҳи васаллам:
«Шом намозидан олдин намоз ўқинглар, деб айтдилар, учинчи мартада одамлар уни суннат қилиб олишини ёқтирмай, ким хоҳласа, дедилар».
Бухорий ва Абу Довуд ривоят қилган.

Умму Ҳабийба розияллоҳу анҳодан ривоят:
«Пайғамбар соллаллоҳу алайҳи васаллам:
«Ким Пешиндан олдинги тўрт ракъатни ва ундан кейинги тўрт ракъатни муҳофаза қилса, Аллоҳ унга дўзах ўтини ҳаром қилади», дедилар».
Абу Довуд, Термизий, Насаий ривоят қилган

Ибн Умар розияллоҳу анҳудан ривоят қилинади:
«Пайғамбар соллаллоҳу алайҳи васаллам:
«Асрдан олдин тўрт ракъат намоз ўқиган одамни Аллоҳ раҳим қилсин», дедилар».
Абу Довуд ва Термизий ривоят қилган.

Абу Ҳурайра розияллоҳу анҳудан ривоят қилинади:
«Пайғамбар соллаллоҳу алайҳи васаллам:
«Ким Шомдан кейин олти ракъат намоз ўқиб уларнинг орасида ёмон гап гапирмаган бўлса, бу унинг учун ўн икки йиллик ибодатга тенг бўлади», дедилар».
Бошқа бир ривоятда:
«Ким Шомдан кейин йигирма ракъат намоз ўқиса, Аллоҳ унинг учун жаннатда бир уй бино қилур», дейилган.
Икки ҳадисни Термизий ривоят қилган.