Имрон ибн Ҳусойн розияллоҳу анҳудан ривоят қилинади: «Менинг бавосирим бор эди. Бас, Пайғамбар соллаллоҳу алайҳи васалламдан намоз ҳақида сўрадим. У зот: «Тик туриб ўқи. Агар қодир бўлмасанг ўтириб ўқи. Агар қодир бўлмасанг ёнбошлаб ўқи», дедилар». Бухорий, Абу Довуд, Термизий, Насаий ривоят қилган
Ибн Аби Авфо розияллоҳу анҳудан ривоят қилинади: «Бир киши Пайғамбар соллаллоҳу алайҳи васалламнинг ҳузурларига келиб: «Мен Қуръондан ҳеч нарсани (ёд) олишга қодир бўла олмаяпман, менга кифоя қиладиган нарсани ўргатиб қўйинг», деди. У зот: «Субҳаналлоҳи, валҳамду лиллаҳи ва лаа илаҳа иллаллоҳу, валлоҳу акбар ва лаа ҳаавла ва лаа қуввата илла биллаҳил алиййил азийм», дегин, дедилар. «Эй, Аллоҳнинг Расули, бу Аллоҳ учун, мен учун-чи?» деди. «Аллоҳумма ирҳамнии варзуқнии ваъвфу аннии ваҳдинии», дегин, дедилар. У ўрнидан тураётиб, қўли билан мана бундоқ қилди. Бас, Расулуллоҳ соллаллоҳу алайҳи васаллам: «Аммо, мана бу икки қўлини яхшиликка тўлдириб олди», дедилар». Абу Довуд ва Насаий ривоят қилган.
|