Ҳамна бинти Жаҳш розияллоҳу анҳодан ривоят қилинади:
«У киши айтадиларки:
«Расулуллоҳ соллаллоҳу алайҳи васалламнинг ҳузурларига бориб:
«Эй, Аллоҳнинг Расули, мен жуда ҳам кўп ва шиддатли ҳайз кўрадиган аёлман, бу ҳақда нима дейсиз, батаҳқиқ, мени намоз ва рўзадан ман қилди», дедим. У зот:
«Мен сенга пахтани васф қилиб бераман. У қонни кетказади», дедилар. У (Ҳамна):
«У ўшандан анча кўп», деди. У зот:
«Унда бир кийим қилиб ол», дедилар. У:
«У ўшандан ҳам кўп. Қуйилиб келаверади», деди.
«Сенга икки ишни буюраман. Улардан қай бирини қилсанг, сен учун кифоя қилади. Агар уларга қувватинг етса, ўзинг биласан. Албатта, бу шайтон тепкиларидан бир тепкидир. Бас, бу Аллоҳ таолонинг илмида-ку, аммо сен олти ёки етти кунни ҳайз сана. Сўнгра ғусл қил. Токи, батаҳқиқ пок бўлдим, деб ишониб, ўзингни топ-тоза қилганингдан сўнг йигирма уч ёки йигирма тўрт кечаю кундуз намоз ўқи ва рўза тут. Мана, шу сенинг учун кифоя қилади. Ҳар ойда шундоқ қилавер. Бу аёлларнинг ҳайз кўриб, пок бўлишларига ва ҳайз ва поклик вақтларига ўхшайди.
Агар кучинг етса, пешинни охирги вақтига, асрни олдинги вақтига суриб, ғусл қиласан-да, икки намозни, пешин ва асрни жам қилиб ўқийсан. Шунингдек, шомни охирги вақтига, хуфтонни олдинги вақтига суриб, ғусл қиласан-да, икки намозни жам қилиб ўқийсан. Бомдодда ҳам ғусл қиласан. Шуни қила олсанг, қил. Рўза ҳам тут. Агар ўшанга қодир бўлсанг. Бу мен учун икки ишдан маҳбуброғидир», дедилар».
Абу Довуд, Термизий, Насаий ривоят қилган