Абу Ҳурайра розияллоҳу анҳудан ривоят қилинади:
«Пайғамбар соллаллоҳу алайҳи васаллам:
«Бетаҳоратлик етказувчи нарсани қилган кимсанинг намози таҳорат қилмагунича қабул бўлмайди», дедилар».
Бухорий, Муслим, Абу Довуд, Термизий ривоят қилган.
Бухорий:
«Ҳазрамавтлик бир одам:
«Эй, Абу Ҳурайра, бетаҳоратлик етказувчи нарса нима?» деди. У:
«Овозсиз чиққан ел ёки овоз билан чиққан ел?», дедини зиёда қилган.
Бошқа бир ривоятда:
«Покликсиз намоз қабул бўлмас, хиёнатли садақа қабул бўлмас», дейилган».

Аббод ибн Тамийм розияллоҳу анҳу ўз амакиларидан ривоят қилганлар:
«Пайғамбар соллаллоҳу алайҳи васалламга намозда бир нарса бўлгани хаёлига келадиган одам ҳақида шикоят қилинди. У зот:
«Токи, овоз эшитмагунча ёки елни топмагунича намозини бузмайди», дедилар».
Бошқа бир ривоятда:
«Қачонки, бирортангиз қорнида бирор нарсани топса, унга ундан бир нарса чиқдими, йўқми аниқ бўлмай қолса, Токи, овозни эшитмагунича ёки елни топмагунича масжиддан чиқмасин», деганлар».
Бухорий, Муслим, Абу Довуд, Термизий ва Насаий ривоят қилган.

Али розияллоҳу анҳудан ривоят қилинади:
«Пайғамбар соллаллоҳу алайҳи васаллам:
 «Орқанинг ипи кўздадир. Бас, ким ухласа, таҳорат қилсин», дедилар».
Абу Довуд ва Ибн Можа ривоят қилишган.

Анас розияллоҳу анҳудан ривоят қилинади:
«Расулуллоҳ соллаллоҳу алайҳи васалламнинг саҳобалари ухлашар, сўнгра намоз ўқишар, таҳорат қилмас эдилар».
Муслим, Абу Довуд, Термизийлар ривоят қилишган.

Ибн Аббос розияллоҳу анҳудан ривоят қилинади:
«Пайғамбар соллаллоҳу алайҳи васаллам:
«Таҳорат фақат ёнбошлаб ухлагангагина вожиб бўлади. Чунки қачон (одам) ёнбошласа бўғинлари бўшашади», дедилар».
Абу Довуд ва Термизий ривоят қилишган.

Бусрата бинти Сафвон розияллоҳу анҳодан ривоят қилинади:
«Пайғамбар соллаллоҳу алайҳи васаллам:
«Ким закарини ушласа, таҳорат қилмагунча намоз ўқимасин»,дедилар».
Абу Довуд, Термизий, Насаий ривоят қилган

Абу Ҳурайра розияллоҳу анҳудан ривоят қилинади:
«Пайғамбар соллаллоҳу алайҳи васаллам:
«Бирортангиз қўлини фаржига олиб борсаю, иккиси орасида тўсиқ ҳам, ажратувчи ҳам бўлмаса таҳорат қилсин», дедилар».
Имом Шофеъий, Аҳмад ва Ҳоким ривоят қилишган.

Толқ ибн Али розияллоҳу анҳудан ривоят қилинади:
«Пайғамбар соллаллоҳу алайҳи васалламнинг ҳузурларига борган эдик, худди бадавийга ўхшаш бир одам келди ва:
«Эй, Аллоҳнинг Набийси, бир одам таҳорат қилгандан кейин закарини ушлашига нима дейсиз?»деди.
У зот соллаллоҳу алайҳи васаллам:
«У ҳам ундан бир парча, халос ёки бир бўлак, халос», дедилар».
Абу Довуд, Термизий, Насаий ривоят қилган

Оиша розияллоҳу анҳодан ривоят қилинади:
«Пайғамбар соллаллоҳу алайҳи васаллам хотинларидан бирини ўпдилар, сўнгра намозга чиқдилар, таҳорат қилмадилар. Урва мен унга:
 «Ўша хотин, сендан бошқа бўлмаса керак», деган эдим, у кулди», деди».
Абу Довуд ва Термизий ривоят қилишган.

Абу Дардо розияллоҳу анҳудан ривоят қилинади:
«Пайғамбар соллаллоҳу алайҳи васаллам қайт қилдилар, сўнгра таҳорат олдилар. Бас, Савбонни Димашқ масжидида учратдим ва ўша нарсани унга зикр қилдим. У:
«Рост айтибди, у кишига мен сув қуйиб берган эдим», деди».
Абу Довуд, Термизий, Насаий ривоят қилган

Ал-Баро розияллоҳу анҳудан ривоят қилинади:
«Расулуллоҳ соллаллоҳу алайҳи васалламдан туянинг гўштидан таҳорат қилиш ҳақида сўралди.
У зот:
«Ундан таҳорат қилинглар» дедилар. Қўйнинг гўшти ҳақида сўралди. У зот:
«Ундан таҳорат қилманглар» дедилар».
Абу Довуд, Муслим ва Термизий ривоят қилишган.

Зайд ибн Собит розияллоҳу анҳудан ривоят қилинади:
«Пайғамбар соллаллоҳу алайҳи васаллам:
«Олов теккан нарсадан таҳорат», дедилар».
Муслим, Абу Довуд, Термизий, Насаий ривоят қилган.

Ибн Аббос розияллоҳу анҳудан ривоят қилинади:
«Расулуллоҳ соллаллоҳу алайҳи васаллам қўйнинг кифтини едилар ва намоз ўқидилар, таҳорат қилмадилар».
Бухорий, Муслим, Абу Довуд ривоят қилган

Жобир розияллоҳу анҳудан ривоят қилинади:
«Расулуллоҳ соллаллоҳу алайҳи васалламдан бу икки ишнинг охиргиси (амал қилингани) олов ўзгартирган нарсадан таҳорат қилмаслик бўлган эди».
Абу Довуд ва Насаий ривоят қилишган.