Аллоҳ таоло: «Улардан кейин (дунёга) келган зотлар айтурлар: «Парвардигоро, Ўзинг бизларни ва бизлардан илгари имон билан ўтган зотларни мағфират қилгин» (Ҳашр сураси, 10-оят), «Ўз гуноҳингиз учун ҳамда мўмин-мўминалар(нинг гуноҳлари) учун мағфират сўранг» (Муҳаммад сураси, 19-оят), Иброҳим алайҳиссалом ҳақларида хабар бериб, «Парвардигоро, ҳисоб-китоб қилинадиган (қиёмат) куни мени, ота-онамни ва барча мўминларни мағфират қилгин» (Иброҳим сураси, 41-оят), Нуҳ алайҳиссалом ҳақларида хабар бериб: «Парвардигорим, Ўзинг мени, ота-онамни, менинг уйимга мўмин ҳолда кирган кишиларни, барча мўмину мўминаларни мағфират қилгин» (Нуҳ сураси, 28-оят), деб айтган.

1042/1. Абу Дардодан (р.а.) ривоят қилинади. Расулуллоҳ соллаллоҳу алайҳи васаллам: «Бирон бир мусулмон банда ғойибдан биродарига дуо қиладиган бўлса, фаришта: сенга ҳам ўша (дуонинг) мислидек бўлсин, дейди», дедилар. Имом Муслим ривоятлари.

Муслимнинг бошқа ривоятларида айтилишича, Расулуллоҳ соллаллоҳу алайҳи васаллам: «Мусулмон кишининг ғойибдан биродарига қилган дуоси мустажобдир. (Дуо қилувчининг) бош тарафида вакил қилинган фаришта туради. Ҳар гал биродарига яхшилик билан дуо қилганда, фаришта «Омин, сенга ҳам унинг мислидек бўлсин», дейди», деганлар.

1043/2. Ибн Умардан (р.а.) ривоят қилинади. Расулуллоҳ соллаллоҳу алайҳи васаллам: «Ижобати тез бўлувчи дуо ғойиб кишининг ғойибдаги кишига қилган дуосидир», дедилар. Абу Довуд ва Термизийлар ривояти. Термизий буни заиф, деганлар.