856/1. Анасдан (р.а.) ривоят қилинади. Расулуллоҳ соллаллоҳу алайҳи васаллам унинг кичик укасига: «Эй Абу Умайр, нима қилди нуғайр (кичик қуш),?» деб айтдилар. Имом Бухорий ва Муслим ривоятлари.

857/2. Анасдан (р.а.) ривоят қилинади. Расулуллоҳ соллаллоҳу алайҳи васаллам унга: «Эй икки қулоқ эгаси», деб айтдилар. Абу Довуд, Термизийлар ривоятлари.

858/3. Бир киши Расулуллоҳ соллаллоҳу алайҳи васаллам ҳузурларига келиб, «Мени (туяга) мингаштириб қўйинг», деди. Расулуллоҳ соллаллоҳу алайҳи васаллам: «Мен сени туянинг боласига мингаштираман», дедилар. Шунда у киши: «Эй Расулуллоҳ, туянинг боласида нима қиламан?» деб (ажабланганида), у зот: «Ахир туянинг боласини ҳам она туя туғадими?» деб айтдилар. Абу Довуд ва Термизийлар ривояти.

859/4. Абу Ҳурайрадан (р.а.) ривоят қилинади. Бу зот: «Эй Расулуллоҳ, сиз ҳам биз билан ҳазиллашасиз-ку», деганларида, у зот: «Мен фақат ҳақ нарсани айтаман», дедилар. Термизий ривоятлари.

860/5. Ибн Аббосдан (р.а.) ривоят қилинади. Расулуллоҳ соллаллоҳу алайҳи васаллам: «Биродаринг билан тортишма, мазах қилма ва хилоф қиладиган бўлсанг, ваъда берма», деб айтдилар. Термизий ривоятлари.

Уламолар: «Ман қилинган мазах ҳаддан ошиб узлуксиз бўлишдадир. Чунки у кулги ва қалб қаттиқлашишини келтириб чиқаради ҳамда Аллоҳ зикридан ва диннинг муҳим ишларидан тўсиб қўяди. Кўп вақтларда у азият беришгача олиб боради. Ва гинага сабаб бўлиб, кишидан ҳайбат ва виқорни кетказади. Аммо кимки бу ишларда ҳаддан ошмаса, Расулуллоҳ соллаллоҳу алайҳи васаллам қилганларидек мазах қилиш маҳбубдир. Расулуллоҳ буларни айрим ҳолатларда кишиларнинг дўстлашиши ва дилкашлик учун қилардилар. Қатъий ҳолатда бунга ман йўқ, балки у юқорида зикр қилинган сифат ила суннат ва мустаҳабдир», деганлар.