Аллоҳ таоло Ҳижр сурасининг 88-оятида: «Ўзингизга эргашган мўмин кишилар учун қанотингизни паст тутинг» (яъни, уларга хушхулқлик билан камтарона муомалада бўлинг), деб айтган.

851/1. Адий ибн Ҳотамдан (р.а.) ривоят қилинади. Расулуллоҳ соллаллоҳу алайҳи васаллам: «Хурмонинг ярмича (садақа бериб) бўлса ҳам, дўзахдан сақланинглар. Кимки уни топа олмаса, мулойим калима билан бўлса ҳам сақлансин», дедилар. Имом Бухорий ва Муслим ривоятлари.

852/2. Абу Ҳурайрадан (р.а.) ривоят қилинади. Расулуллоҳ соллаллоҳу алайҳи васаллам: «Ҳар куни киши ҳар бир аъзоси ва бўғимига садақа қилиши лозимдир. Икки кишининг орасини ислоҳ этиш ҳам садақадир. Уловига чиқаётганда ёрдамлашиб қўйилса ёки юкини юклашиб берилса, у ҳам садақадир. Мулойим сўз ҳам садақадир. Намозга юриб борилган ҳар бир қадам ҳам садақадир. Йўлдан азият берувчи нарсаларни олиб ташлаш ҳам садақадир», дедилар. Имом Бухорий ва Муслим ривоятлари.

853/3. Абу Заррдан (р.а.) ривоят қилинади. Расулуллоҳ соллаллоҳу алайҳи васаллам: «Яхшиликлардан бирортасини паст санамагин, агар биродарингга очиқ юз билан йўлиқиб бўлса ҳам, яхшилик қилгин», дедилар (яъни, биродарига очиқ юз билан йўлиқиш ҳам яхшиликдир). Имом Муслим ривоятлари.